Глас 1-й
Кáмени запечáтану от иудéй, и вóином стрегу́щим пречи́стое тéло Твоé, воскрéсл еси́ триднéвный, Спáсе, дáруяй ми́рови жизнь: сегó рáди Си́лы Небéсныя вопия́ху Ти, Жизнодáвче: слáва Воскресéнию Твоéму, Христé, слáва Цáрствию Твоéму, слáва смотрéнию Твоéму, еди́не Человеколю́бче.
Глас 2-й
Егдá снизшéл еси́ к смéрти, Животé Безсмéртный, тогдá ад умертви́л еси́ блистáнием Божествá: егдá же и умéршия от преиспóдних воскреси́л еси́, вся Си́лы Небéсныя взывáху: Жизнодáвче Христé Бóже наш, слáва Тебé.
Глас 3-й
Да веселя́тся небéсная, да рáдуются земнáя, я́ко сотвори́ держáву мы́шцею Своéю Госпóдь, попрá смéртию смерть, пéрвенец мéртвых бысть, из чрéва áдова избáви нас, и подадé ми́рови вéлию ми́лость.
Глас 4-й
Свéтлую воскресéния прóповедь, от Ангела увéдевша Госпóдни учени́цы, и прáдеднее осуждéние отвéргша, апóстолом хваля́щася глагóлаху: испровéржеся смерть, воскрéсе Христóс Бог, дáруяй ми́рови вéлию ми́лость.
Глас 5-й
Со безначáльное Слóво Отцу́ и Ду́хови, от Дéвы рóждшееся на спасéние нáше, воспои́м вéрнии и поклони́мся, я́ко благоволи́ плóтию взы́ти на Крест, и смерть претерпéти, и воскреси́ти умéршия слáвным Воскресéнием Свои́м.
Глас 6-й
Ангельския си́лы на грóбе Твоéм, и стрегу́щии омертвéша, и стоя́ше Мари́я во грóбе, и́щущи пречи́стаго тéла Твоегó. Плени́л еси́ ад, не искуси́вся от негó: срéтил еси́ Дéву, дáруяй живóт. Воскресы́й из мéртвых, Гóсподи, слáва Тебé.
Глас 7-й
Разруши́л еси́ Крестóм Твои́м смерть, отвéрзл еси́ разбóйнику рай: миронóсицам плач преложи́л еси́, и апо́столом проповéдати повелéл еси́, я́ко воскрéсл еси́, Христé Бóже, дáруяй ми́рови вéлию ми́лость.
Глас 8-й
С высоты́ снизшéл еси́, Благоутрóбне, погребéние прия́л еси́ триднéвное, да нас свободи́ши страстéй, животé и воскресéние нáше, Гóсподи, слáва Тебé.