Песнь 1, глас 6:
Ирмос: Помо́щник и Покрови́тель бысть мне во спасе́ние, Сей мой Бог, и просла́влю Его́, Бог отца́ моего́, и вознесу́ Его́: сла́вно бо просла́вися.
Поми́луй мя, Бо́же, поми́луй мя.
Отку́ду начну́ пла́кати окая́ннаго моего́ жития́ дея́ний? Ко́е ли положу́ нача́ло, Христе́, ны́нешнему рыда́нию? Но я́ко благоутро́бен, даждь ми прегреше́ний оставле́ние.
Поми́луй мя, Бо́же, поми́луй мя.
Гряди́ окая́нная душе́, с пло́тию твое́ю, Зижди́телю всех испове́ждься, и оста́нися про́чее пре́ждняго безслове́сия, и принеси́ Бо́гу в покая́нии сле́зы.
Поми́луй мя, Бо́же, поми́луй мя.
Первозда́ннаго Ада́ма преступле́нию поревнова́в, позна́х себе́ обнаже́на от Бо́га и присносу́щнаго Ца́рствия и сла́дости, грех ра́ди мои́х.
Поми́луй мя, Бо́же, поми́луй мя.
Увы мне окая́нная душе́, что уподо́билася еси́ пе́рвей Еве? Ви́дела бо еси́ зле, и уязви́лася еси́ го́рце, и косну́лася еси́ дре́ва и вкуси́ла еси́ де́рзостно безслове́сныя сне́ди.
Поми́луй мя, Бо́же, поми́луй мя.
Вме́сто Евы чу́вственныя мы́сленная ми бысть Ева, во пло́ти стра́стный по́мысл, показу́яй сла́дкая и вкуша́яй при́сно го́рькаго напое́ния.
Поми́луй мя, Бо́же, поми́луй мя.
Досто́йно из Еде́ма изгна́н бысть, я́ко не сохрани́в еди́ну Твою́, Спа́се, за́поведь Ада́м: аз же что постражду́, отмета́я всегда́ живо́тная Твоя́ словеса́?
Поми́луй мя, Бо́же, поми́луй мя.
Ка́иново преше́д уби́йство, произволе́нием бых уби́йца со́вести душе́вней, оживи́в плоть, и воева́в на ню лука́выми мои́ми дея́ньми.
Поми́луй мя, Бо́же, поми́луй мя.
Авелеве Иису́се, не уподо́бихся пра́вде, да́ра Тебе́ прия́тна не принесо́х когда́, ни дея́ния боже́ственна, ни же́ртвы чи́стыя, ни жития́ непоро́чнаго.
Поми́луй мя, Бо́же, поми́луй мя.
Яко Ка́ин и мы, душе́ окая́нная, всех Соде́телю дея́ния скве́рная, и же́ртву поро́чную, и непотре́бное житие́ принесо́хом вку́пе: те́мже и осуди́хомся.
Поми́луй мя, Бо́же, поми́луй мя.
Бре́ние Зда́тель живосозда́в, вложи́л еси́ мне плоть и ко́сти, и дыха́ние и жизнь: но о Тво́рче мой, Изба́вителю мой, и Судие́ ка́ющася приими́ мя.
Поми́луй мя, Бо́же, поми́луй мя.
Извеща́ю Ти Спа́се, грехи́, я́же соде́ях, и души́ и те́ла моего́ я́звы, я́же внутрь уби́йственнии по́мыслы разбо́йнически на мя возложи́ша.
Поми́луй мя, Бо́же, поми́луй мя.
Аще и согреши́х, Спа́се, но вем, я́ко Человеколю́бец еси́, наказу́еши ми́лостивно, и милосе́рдствуеши те́пле: слезя́ща зри́ши, и притека́еши я́ко Оте́ц, призыва́я блу́днаго.
Поми́луй мя, Бо́же, поми́луй мя.
Пове́ржена мя Спа́се, пред враты́ Твои́ми, поне́ на ста́рость не отри́ни мене́ во ад тща, но пре́жде конца́, я́ко Человеколю́бец, даждь ми прегреше́ний оставле́ние.
Поми́луй мя, Бо́же, поми́луй мя.
В разбо́йники впады́й аз есмь, помышле́ньми мои́ми, весь от них уязви́хся ны́не, и испо́лнихся ран, но Сам ми предста́в, Христе́ Спа́се исцели́.
Поми́луй мя, Бо́же, поми́луй мя.
Свяще́нник мя предви́дев ми́мо и́де, и леви́т ви́дя в лю́тых на́га презре́, но из Мари́и возсия́вый Иису́се, Ты предста́в уще́дри мя.
Поми́луй мя, Бо́же, поми́луй мя.
Агнче Бо́жий, взе́мляй грехи́ всех, возми́ бре́мя от мене́ тя́жкое грехо́вное, и я́ко благоутро́бен, даждь ми сле́зы умиле́ния.
Поми́луй мя, Бо́же, поми́луй мя.
Покая́ния вре́мя, прихожду́ Ти Созда́телю моему́, возми́ бре́мя от мене́ тя́жкое грехо́вное, и я́ко благоутро́бен, даждь ми сле́зы умиле́ния.
Поми́луй мя, Бо́же, поми́луй мя.
Не возгнуша́йся мене́ Спа́се, не отри́ни от Твоего́ лица́, возми́ бре́мя от мене́ тя́жкое грехо́вное, и я́ко благоутро́бен, даждь мне грехопаде́ний оставле́ние.
Поми́луй мя, Бо́же, поми́луй мя.
Во́льная, Спа́се, и нево́льная прегреше́ния моя́, явле́нная и сокрове́нная и ве́домая и неве́домая, вся прости́в, я́ко Бог, очи́сти и спаси́ мя.
Поми́луй мя, Бо́же, поми́луй мя.
От ю́ности Христе́, за́поведи Твоя́ преступи́х, всестра́стно небреги́й, уны́нием преидо́х житие́. Те́мже зову́ Ти Спа́се: поне́ на коне́ц спаси́ мя.
Поми́луй мя, Бо́же, поми́луй мя.
Бога́тство мое́ Спа́се, изнури́в в блуде́, пуст есмь плодо́в благочести́вых, а́лчен же зову́: Отче щедро́т, предвари́в Ты мя уще́дри.
Поми́луй мя, Бо́же, поми́луй мя.
Тебе́ припа́даю Иису́се, согреши́х Ти, очи́сти мя, возми́ бре́мя от мене́ тя́жкое грехо́вное, и я́ко благоутро́бен, даждь ми сле́зы умиле́ния.
Поми́луй мя, Бо́же, поми́луй мя.
Не вни́ди со мно́ю в суд нося́ моя́ дея́ния, словеса́ изыску́я, и исправля́я стремле́ния, но в щедро́тах Твои́х презира́я моя́ лю́тая, спаси́ мя Всеси́льне.
Иный канон преподобныя матере нашея Марии Египетския, глас 6:
Преподо́бная ма́ти Мари́е, моли́ Бо́га о нас.
Ты ми даждь светоза́рную благода́ть от Боже́ственнаго свы́ше Промышле́ния, избежа́ти страсте́й омраче́ния, и пе́ти усе́рдно, твоего́ Мари́е жития́, кра́сная исправле́ния.
Преподо́бная ма́ти Мари́е, моли́ Бо́га о нас.
Прикло́ньшися Христо́вым Боже́ственным зако́ном, к Сему́ приступи́ла еси́, сла́достей неудержи́мая стремле́ния оста́вивши, и вся́кую доброде́тель всеблагогове́йно, я́ко еди́ну испра́вила еси́.
Преподо́бне о́тче Андре́е, моли́ Бо́га о нас.
Моли́твами твои́ми нас, Андре́е, изба́ви страсте́й безче́стных и Ца́рствия ны́не Христо́ва о́бщники ве́рою и любо́вию воспева́ющия тя, сла́вне, покажи́, мо́лимся.
Сла́ва Отцу́ и Сы́ну и Свято́му Ду́ху.
Троичен: Пресу́щная Тро́ице, во Еди́нице покланя́емая, возми́ бре́мя от мене́ тя́жкое грехо́вное, и я́ко благоутро́бна, даждь ми сле́зы умиле́ния.
И ны́не и при́сно и во ве́ки веко́в. Ами́нь.
Богородичен: Богоро́дице, наде́жде и предста́тельство Тебе́ пою́щих, возми́ бре́мя от мене́ тя́жкое грехо́вное, и я́ко Влады́чица Чи́стая, ка́ющася приими́ мя.
Песнь 2
Ирмос: Вонми́, не́бо, и возглаго́лю, и воспою́ Христа́, от Де́вы пло́тию прише́дшаго.
Поми́луй мя, Бо́же, поми́луй мя.
Вонми́ не́бо, и возглаго́лю, земле́, внуша́й глас, ка́ющийся к Бо́гу и воспева́ющий Его́.
Поми́луй мя, Бо́же, поми́луй мя.
Вонми́ ми, Бо́же, Спа́се мой ми́лостивным Твои́м о́ком, и приими́ мое́ те́плое испове́дание.
Поми́луй мя, Бо́же, поми́луй мя.
Согреши́х па́че всех челове́к, еди́н согреши́х Тебе́; но уще́дри я́ко Бог, Спа́се, творе́ние Твое́.
Поми́луй мя, Бо́же, поми́луй мя.
Бу́ря мя злых обдержи́т, благоутро́бне Го́споди: но я́ко Петру́, и мне ру́ку простри́.
Поми́луй мя, Бо́же, поми́луй мя.
Сле́зы блудни́цы, Ще́дре, и аз предлага́ю: очи́сти мя, Спа́се, благоутро́бием Твои́м.
Поми́луй мя, Бо́же, поми́луй мя.
Омрачи́х душе́вную красоту́ страсте́й сластьми́, и вся́чески весь ум персть сотвори́х.
Поми́луй мя, Бо́же, поми́луй мя.
Раздра́х ны́не оде́жду мою́ пе́рвую, и́же ми изтка́ Зижди́тель из нача́ла, и отту́ду лежу́ наг.
Поми́луй мя, Бо́же, поми́луй мя.
Облеко́хся в раздра́нную ри́зу, ю́же изтка́ ми змий сове́том, и стыжду́ся.
Поми́луй мя, Бо́же, поми́луй мя.
Воззре́х на садо́вную красоту́ и прельсти́хся умо́м: и отту́ду лежу́ наг, и срамля́юся.
Поми́луй мя, Бо́же, поми́луй мя.
Де́лаша на хребте́ мое́м вси нача́льницы страсте́й, продолжа́юще на мя беззако́ние их.
Поми́луй мя, Бо́же, поми́луй мя.
Погуби́х первозда́нную добро́ту и благоле́пие мое́, и ны́не лежу́ наг, и стыжду́ся.
Поми́луй мя, Бо́же, поми́луй мя.
Сшива́ше ко́жныя ри́зы грех мне, обнажи́вый мя пе́рвыя боготка́нныя оде́жды.
Поми́луй мя, Бо́же, поми́луй мя.
Обложе́н есмь одея́нием студа́, я́коже ли́ствием смоко́вным, во обличе́ние мои́х самовла́стных страсте́й.
Поми́луй мя, Бо́же, поми́луй мя.
Оде́яхся в сра́мную ри́зу, и окровавле́нную сту́дно, тече́нием стра́стнаго и любосла́стнаго живота́.
Поми́луй мя, Бо́же, поми́луй мя.
Оскверни́х пло́ти моея́ ри́зу и окаля́х е́же по о́бразу, Спа́се, и по подо́бию.
Поми́луй мя, Бо́же, поми́луй мя.
Впадо́х в стра́стную па́губу и в веще́ственную тлю, и отто́ле до ны́не враг мне досажда́ет.
Поми́луй мя, Бо́же, поми́луй мя.
Любове́щное и любоиме́нное житие́, невоздержа́нием Спа́се предпоче́т ны́не, тя́жким бре́менем обложе́н есмь.
Поми́луй мя, Бо́же, поми́луй мя.
Украси́х плотски́й о́браз скве́рных помышле́ний разли́чным обложе́нием, и осужда́юся.
Поми́луй мя, Бо́же, поми́луй мя.
Вне́шним приле́жно благоукраше́нием еди́нем попеко́хся, вну́треннюю презре́в богообра́зную ски́нию.
Поми́луй мя, Бо́же, поми́луй мя.
Вообрази́в мои́х страсте́й безобра́зие, любосла́стными стремле́ньми погуби́х ума́ красоту́.
Поми́луй мя, Бо́же, поми́луй мя.
Погребо́х пе́рваго о́браза добро́ту Спа́се страстьми́, ю́же я́ко иногда́ дра́хму, взыска́в обря́щи.
Поми́луй мя, Бо́же, поми́луй мя.
Согреши́х, я́коже блудни́ца вопию́ Ти: еди́н согреши́х Тебе́, я́ко ми́ро приими́ Спа́се и моя́ сле́зы.
Поми́луй мя, Бо́же, поми́луй мя.
Поползо́хся я́ко Дави́д блу́дно, и оскверни́хся, но омы́й и мене́ Спа́се, слеза́ми.
Поми́луй мя, Бо́же, поми́луй мя.
Очи́сти, я́коже мыта́рь вопию́ Ти, Спа́се, очи́сти мя: никто́же бо су́щих из Ада́ма, я́коже аз согреши́х Тебе́.
Поми́луй мя, Бо́же, поми́луй мя.
Ни слез, ниже́ покая́ния и́мам, ниже́ умиле́ния: Сам ми сия́ Спа́се, я́ко Бог да́руй.
Поми́луй мя, Бо́же, поми́луй мя.
Дверь Твою́ не затвори́ мне тогда́, Го́споди, Го́споди, но отве́рзи ми сию́ ка́ющемуся Тебе́.
Поми́луй мя, Бо́же, поми́луй мя.
Человеколю́бче хотя́й всем спасти́ся, Ты воззови́ мя, и приими́ я́ко Благ ка́ющагося.
Поми́луй мя, Бо́же, поми́луй мя.
Внуши́ воздыха́ния души́ моея́, и о́чию мое́ю приими́ ка́пли Спа́се, и спаси́ мя.
Пресвята́я Богоро́дице, спаси́ нас.
Пречи́стая Богоро́дице Де́во, еди́на Всепе́тая, моли́ приле́жно, во е́же спасти́ся нам.
Иный канон
Ирмос: Ви́дите, ви́дите, я́ко Аз есмь Бог, ма́нну одожди́вый и во́ду из ка́мене источи́вый дре́вле в пусты́ни лю́дем Мои́м, десни́цею еди́ною и кре́постию Мое́ю.
Поми́луй мя, Бо́же, поми́луй мя.
Ви́дите ви́дите, я́ко Аз есмь Бог: внуша́й душе́ моя́ Го́спода вопию́ща, и удали́ся пре́жняго греха́, и бо́йся я́ко неумы́тнаго, и я́ко Судии́ и Бо́га.
Поми́луй мя, Бо́же, поми́луй мя.
Кому́ уподо́билася еси́ многогре́шная душе́, то́кмо пе́рвому Ка́ину, и Ламе́ху о́ному, каменова́вшая те́ло злоде́йствы, и уби́вшая ум безслове́сными стремле́ньми.
Поми́луй мя, Бо́же, поми́луй мя.
Вся пре́жде зако́на прете́кши, о душе́! Си́фу не уподо́билася еси́, ни Ено́са подража́ла еси́, ни Ено́ха преложе́нием, ни Но́я, но яви́лася еси́ убо́га пра́ведных жи́зни.
Поми́луй мя, Бо́же, поми́луй мя.
Еди́на отве́рзла еси́ хля́би гне́ва, Бо́га твоего́, душе́ моя́, и потопи́ла еси́ всю, я́коже зе́млю плоть, и дея́ния и житие́, и пребыла́ еси́ вне спаси́тельнаго ковче́га.
Поми́луй мя, Бо́же, поми́луй мя.
Му́жа уби́х, глаго́лет, в я́зву мне, и ю́ношу в струп, Ламе́х рыда́я вопия́ше; ты же не трепе́щеши о душе́ моя́, окаля́вши плоть, и ум оскверни́вши.
Поми́луй мя, Бо́же, поми́луй мя.
О ка́ко поревнова́х Ламе́ху, пе́рвому уби́йце, ду́шу я́ко му́жа, ум я́ко ю́ношу, я́ко бра́та же моего́ те́ло уби́в, я́ко Ка́ин уби́йца, любосла́стными стремле́ньми.
Поми́луй мя, Бо́же, поми́луй мя.
Столп умудри́ла еси́ созда́ти о душе́, и утвержде́ние водрузи́ти твои́ми похотьми́, а́ще не бы Зижди́тель удержа́л сове́ты твоя́, и низве́ргл на зе́млю ухищре́ния твоя́.
Поми́луй мя, Бо́же, поми́луй мя.
Уязви́хся, ура́нихся, се стре́лы вра́жия уязви́вшия мою́ ду́шу и те́ло: се стру́пи, гное́ния, омраче́ния, вопию́т ра́ны самово́льных мои́х страсте́й.
Поми́луй мя, Бо́же, поми́луй мя.
Одожди́ Госпо́дь от Го́спода огнь иногда́, на беззако́ние гне́вающее соже́г содо́мляны: ты же огнь вжегла́ еси́ гее́нский, в не́мже и́маши, о душе́, сожещи́ся.
Поми́луй мя, Бо́же, поми́луй мя.
Разуме́йте и ви́дите, я́ко Аз есмь Бог, испыта́яй сердца́, и уму́чаяй мы́сли, облича́яй дея́ния, и попаля́яй грехи́, и судя́й си́ру, и смире́ну, и ни́щу.
Преподо́бная ма́ти Мари́е, моли́ Бо́га о нас.
Просте́рла еси́ ру́це твои́ к ще́дрому Бо́гу, Мари́е, в бе́здне зол погружа́емая: и я́коже Петру́ человеколю́бно, ру́ку Боже́ственную простре́, твое́ обраще́ние вся́чески иски́й.
Преподо́бная ма́ти Мари́е, моли́ Бо́га о нас.
Всем усе́рдием и любо́вию притекла́ еси́ Христу́, пе́рвый греха́ путь отвра́щши, и в пусты́нях непроходи́мых пита́ющися, и Того́ чи́сте соверша́ющи Боже́ственныя за́поведи.
Преподо́бне о́тче Андре́е, моли́ Бо́га о нас.
Ви́дим, ви́дим человеколю́бие, о душе́, Бо́га и Влады́ки: сего́ ра́ди пре́жде конца́, Тому́ со слеза́ми припаде́м вопию́ще: Андре́я моли́твами, Спа́се, поми́луй нас.
Сла́ва Отцу́ и Сы́ну и Свято́му Ду́ху.
Троичен: Безнача́льная, Несозда́нная Тро́ице, Неразде́льная Еди́нице, ка́ющася мя приими́, согреши́вша спаси́, Твое́ есмь созда́ние, не пре́зри, но пощади́, и изба́ви мя о́гненнаго осужде́ния.
И ны́не и при́сно и во ве́ки веко́в. Ами́нь.
Богородичен: Пречи́стая Влады́чице Богороди́тельнице, наде́ждо к Тебе́ притека́ющих, и приста́нище су́щих в бу́ри, Ми́лостиваго и Созда́теля, и Сы́на Твоего́, уми́лостиви и мне моли́твами Твои́ми.
Песнь 3
Ирмос: На недви́жимом, Христе́, ка́мени за́поведий Твои́х, утверди́ мое́ помышле́ние.
Поми́луй мя, Бо́же, поми́луй мя.
Огнь от Го́спода иногда́ Госпо́дь одожди́в, зе́млю Содо́мскую пре́жде попали́.
Поми́луй мя, Бо́же, поми́луй мя.
На горе́ спаса́йся, душе́, я́коже Лот о́ный, и в Сиго́р угонза́й.
Поми́луй мя, Бо́же, поми́луй мя.
Бе́гай запале́ния, о душе́, бе́гай Содо́мскаго горе́ния, бе́гай тле́ния Боже́ственнаго пла́мене.
Поми́луй мя, Бо́же, поми́луй мя.
Испове́даюся Тебе́, Спа́се: согреши́х, согреши́х Ти: но осла́би, оста́ви ми, я́ко благоутро́бен.
Поми́луй мя, Бо́же, поми́луй мя.
Согреши́х Тебе́ еди́н аз, согреши́х па́че всех, Христе́ Спа́се, да не пре́зриши мене́.
Поми́луй мя, Бо́же, поми́луй мя.
Ты еси́ Па́стырь до́брый, взыщи́ мене́ а́гнца, и заблу́ждшаго да не пре́зриши мене́.
Поми́луй мя, Бо́же, поми́луй мя.
Ты еси́ сла́дкий, Иису́се, Ты еси́ Созда́телю мой: в Тебе́, Спа́се, оправда́юся.
Сла́ва Отцу́ и Сы́ну и Свято́му Ду́ху.
Троичен: О Тро́ице Еди́нице Бо́же! Спаси́ нас от пре́лести, и искуше́ний, и обстоя́ний.
И ны́не и при́сно и во ве́ки веко́в. Ами́нь.
Богородичен: Ра́дуйся, Богоприя́тная утро́бо, ра́дуйся, престо́ле Госпо́день, ра́дуйся, Ма́ти Жи́зни на́шея.
Иный канон
Ирмос: Утверди́, Го́споди, на ка́мени за́поведей Твои́х подви́гшееся се́рдце мое́, я́ко Еди́н Свят еси́ и Госпо́дь.
Поми́луй мя, Бо́же, поми́луй мя.
Исто́чник живота́ стяжа́х Тебе́, сме́рти низложи́теля, и вопию́ Ти от се́рдца моего́ пре́жде конца́: согреши́х, очи́сти и спаси́ мя.
Поми́луй мя, Бо́же, поми́луй мя.
При Но́и, Спа́се, блу́дствовавшия подража́х, о́нех насле́дствовав осужде́ние, в пото́пе погруже́ния.
Поми́луй мя, Бо́же, поми́луй мя.
Согреши́х, Го́споди, согреши́х Тебе́, очи́сти мя: несть бо и́же кто согреши́ в челове́цех, его́же не превзыдо́х прегреше́ньми.
Поми́луй мя, Бо́же, поми́луй мя.
Ха́ма о́наго душе́, отцеуби́йца подража́вши, сра́ма не покры́ла еси́ и́скренняго, вспять зря возврати́вшися.
Поми́луй мя, Бо́же, поми́луй мя.
Благослове́ния Си́мова не насле́довала еси́ душе́ окая́нная, ни простра́нное одержа́ние, я́коже Иа́феф име́ла еси́ на земли́ оставле́ния.
Поми́луй мя, Бо́же, поми́луй мя.
От земли́ Харра́н, изы́ди от греха́ душе́ моя́, гряди́ в зе́млю точа́щую присноживо́тное нетле́ние, е́же Авраа́м насле́дствова.
Поми́луй мя, Бо́же, поми́луй мя.
Авраа́ма слы́шала еси́ душе́ моя́, дре́вле оста́вльша зе́млю оте́чества, и бы́вша прише́льца, сего́ произволе́нию подража́й.
Поми́луй мя, Бо́же, поми́луй мя.
У ду́ба Мамври́йскаго учреди́в патриа́рх Ангелы, насле́дствова по ста́рости обетова́ния лови́тву.
Поми́луй мя, Бо́же, поми́луй мя.
Исаа́ка окая́нная душе́ моя́, разуме́вши но́вую же́ртву, та́йно всесожже́нную Го́сподеви, подража́й его́ произволе́нию.
Поми́луй мя, Бо́же, поми́луй мя.
Исма́ила слы́шала еси́, трезви́ся душе́ моя́, изгна́на я́ко рабы́нино отрожде́ние, виждь, да не ка́ко подо́бно что постра́ждеши ласкосе́рдствующи.
Поми́луй мя, Бо́же, поми́луй мя.
Ага́ре дре́вле душе́, еги́птяныне уподо́билася еси́, порабо́тившися произволе́нием, и ро́ждши но́ваго Исма́ила, презо́рство.
Поми́луй мя, Бо́же, поми́луй мя.
Иа́ковлю ле́ствицу разуме́ла еси́ душе́ моя́, явля́емую от земли́ к небесе́м, почто́ не име́ла еси́ восхо́да тве́рда, благоче́стия.
Поми́луй мя, Бо́же, поми́луй мя.
Свяще́нника Бо́жия, и царя́ уедине́на, Христо́во подо́бие, в ми́ре жития́, в челове́цех подража́й.
Поми́луй мя, Бо́же, поми́луй мя.
Не бу́ди столп сла́ный душе́, возврати́вшися вспять, о́браз да устраши́т тя Содо́мский, горе́ в Сиго́р спаса́йся.
Поми́луй мя, Бо́же, поми́луй мя.
Запале́ния я́коже Лот, бе́гай душе́ моя́ греха́: бе́гай Содо́мы и Гомо́рры, бе́гай пла́мене вся́каго безслове́снаго жела́ния.
Поми́луй мя, Бо́же, поми́луй мя.
Поми́луй Го́споди, поми́луй мя, вопию́ Ти, егда́ прии́деши со Ангелы Твои́ми, возда́ти всем по достоя́нию дея́ний.
Поми́луй мя, Бо́же, поми́луй мя.
Моле́ния Влады́ко, Тебе́ пою́щих не отве́ржи, но уще́дри Человеколю́бче, и пода́ждь ве́рою прося́щим оставле́ние.
Преподо́бная ма́ти Мари́е, моли́ Бо́га о нас.
Содержи́мь есмь бу́рею, и треволне́нием согреше́ний, но сама́ мя ма́ти ны́не спаси́, и к приста́нищу Боже́ственнаго покая́ния возведи́.
Преподо́бная ма́ти Мари́е, моли́ Бо́га о нас.
Ра́бское моле́ние и ны́не преподо́бная прине́сши ко благоутро́бней моли́твами твои́ми Богоро́дице, отве́рзи ми Боже́ственныя вхо́ды.
Преподо́бне о́тче Андре́е, моли́ Бо́га о нас.
Твои́ми моли́твами да́руй и мне оставле́ние долго́в, о Андре́е, Кри́тский председа́телю! покая́ния бо ты таи́нник преизря́дный.
Сла́ва Отцу́ и Сы́ну и Свято́му Ду́ху.
Троичен: Тро́ице Про́стая, Несозда́нная, Безнача́льное Естество́, в Тро́ице пева́емая Ипоста́сей, спаси́ ны ве́рою покланя́ющияся держа́ве Твое́й.
И ны́не и при́сно и во ве́ки веко́в. Ами́нь.
Богородичен: От Отца́ безле́тна Сы́на, в ле́то Богороди́тельнице неискусому́жно родила́ еси́, стра́нное чу́до, пребы́вши Де́ва доя́щи.
Ирмос: Утверди́, Го́споди, на ка́мени за́поведей Твои́х подви́гшееся се́рдце мое́, я́ко Еди́н Свят еси́ и Госпо́дь.
Седален, господина Иосифа, глас 8: Свети́ла богозра́чная, Спа́совы апо́столи, просвети́те нас во тьме жития́, я́ко да во дни ны́не благообра́зно хо́дим, све́том воздержа́ния нощны́х страсте́й отбега́юще, и све́тлыя стра́сти Христо́вы у́зрим, ра́дующеся.
Сла́ва Отцу́ и Сы́ну и Свято́му Ду́ху.
Другий седален, глас 8: Апо́стольская двоенадеся́тице богоизбра́нная, мольбу́ Христу́ ны́не принеси́, по́стное по́прище всем прейти́, соверша́ющим во умиле́нии моли́твы, творя́щим усе́рдно доброде́тели, я́ко да си́це предвари́м ви́дети Христа́ Бо́га сла́вное Воскресе́ние, сла́ву и хвалу́ принося́ще.
И ны́не и при́сно и во ве́ки веко́в. Ами́нь.
Богородичен: Непостижи́маго Бо́га, Сы́на и Сло́во, несказа́нно па́че ума́ из Тебе́ ро́ждшееся, моли́ Богоро́дице со апо́столы, мир вселе́нней чи́стый пода́ти, и согреше́ний да́ти нам пре́жде конца́ проще́ние, и Ца́рствия Небе́снаго кра́йния ра́ди бла́гости, сподо́бити рабы́ Твоя́.
Таже трипеснец, без поклонов, глас 8.
Песнь 4
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Святи́и апо́столи, моли́те Бо́га о нас.
Воздержа́нием пожи́вше просвеще́ннии Христо́вы апо́столи, воздержа́ния вре́мя нам хода́тайствы Боже́ственными утиша́ют.
Святи́и апо́столи, моли́те Бо́га о нас.
Двоенадесятостру́нный орга́н, песнь воспе́ спаси́тельную, ученико́в лик боже́ственный, лука́вая возмуща́я гласова́ния.
Святи́и апо́столи, моли́те Бо́га о нас.
Одожде́нием духо́вным всю подсо́лнечную напои́сте, су́шу отгна́вше многобо́жия всеблаже́ннии.
Пресвята́я Богоро́дице, спаси́ нас.
Смири́вшася спаси́ мя, высокому́дренно пожи́вшаго, ро́ждшая Возне́сшаго смире́нное естество́, Де́во Всечи́стая.
Иный трипеснец
Ирмос, глас тойже: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Святи́и апо́столи, моли́те Бо́га о нас.
Апо́стольское всечестно́е ликостоя́ние, Зижди́теля всех моля́щее, проси́ поми́ловати ны восхваля́ющия тя.
Святи́и апо́столи, моли́те Бо́га о нас.
Яко де́лателе су́ще Христо́вы апо́столи, во всем ми́ре Боже́ственным Сло́вом возде́лавшии, прино́сите плоды́ Ему́ всегда́.
Святи́и апо́столи, моли́те Бо́га о нас.
Виногра́д бы́сте Христо́в вои́стинну возлю́бленный, вино́ бо духо́вное источи́сте ми́ру апо́столи.
Пресвята́я Тро́ице Бо́же наш, сла́ва Тебе́.
Пренача́льная, Сообра́зная, Всеси́льнейшая Тро́ице Свята́я, Отче, Сло́ве и Ду́ше Святы́й, Бо́же, Све́те и Животе́, сохрани́ ста́до Твое́.
Пресвята́я Богоро́дице, спаси́ нас.
Ра́дуйся, престо́ле огнезра́чный, ра́дуйся, свети́льниче свещено́сный, ра́дуйся, горо́ освяще́ния, ковче́же жи́зни, святы́х свята́я се́не.
Великого канона ирмос: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слух Твой и убоя́хся, сла́ва си́ле Твое́й, Го́споди.
Поми́луй мя, Бо́же, поми́луй мя.
Дел Твои́х да не пре́зриши, созда́ния Твоего́ да не оста́виши, Правосу́де. Аще и еди́н согреши́х, я́ко человек, па́че вся́каго челове́ка, Человеколю́бче, но и́маши, я́ко Госпо́дь всех, власть оставля́ти грехи́.
Поми́луй мя, Бо́же, поми́луй мя.
Приближа́ется, душе́, коне́ц, приближа́ется, и неради́ши, ни гото́вишися: вре́мя сокраща́ется, воста́ни, близ при две́рех Судия́ есть: я́ко со́ние, я́ко цвет, вре́мя жития́ тече́т: что всу́е мяте́мся?
Поми́луй мя, Бо́же, поми́луй мя.
Воспряни́, о душе́ моя́, дея́ния твоя́, я́же соде́лала еси́, помышля́й, и сия́ пред лице́ твое́ принеси́, и ка́пли испусти́ слез твои́х: рцы со дерзнове́нием дея́ния и помышле́ния Христу́, и оправда́йся.
Поми́луй мя, Бо́же, поми́луй мя.
Не бысть в житии́ греха́, ни дея́ния, ни зло́бы, ея́же аз, Спа́се, не согреши́х умо́м и сло́вом, и произволе́нием и предложе́нием, и мы́слию, и дея́нием согреши́в, я́ко ин никто́же когда́.
Поми́луй мя, Бо́же, поми́луй мя.
Отсю́ду и осужде́н бых, отсю́ду препре́н бых аз окая́нный от своея́ со́вести, ея́же ничто́же в ми́ре нужне́йше; Судие́, Изба́вителю мой, и ве́дче, пощади́ и изба́ви, и спаси́ мя раба́ Твоего́.
Поми́луй мя, Бо́же, поми́луй мя.
Ле́ствица, ю́же ви́де дре́вле вели́кий в патриа́рсех, указа́ние есть душе́ моя́, де́ятельнаго восхожде́ния, разу́мнаго возше́ствия; а́ще хо́щеши у́бо, дея́нием, и ра́зумом, и зре́нием пожи́ти, обнови́ся.
Поми́луй мя, Бо́же, поми́луй мя.
Зной дневны́й претерпе́ лише́ния ра́ди патриа́рх, и мраз нощны́й понесе́, на всяк день снабде́ния творя́, пасы́й, тружда́яйся, рабо́таяй, да две жене́ сочета́ет.
Поми́луй мя, Бо́же, поми́луй мя.
Жены́ ми две разуме́й, дея́ние же и ра́зум в зре́нии, Ли́ю у́бо дея́ние, я́ко многоча́дную: Рахи́ль же ра́зум, я́ко многотру́дную: и́бо кроме́ трудо́в, ни дея́ние, ни зре́ние душе́, испра́вится.
Поми́луй мя, Бо́же, поми́луй мя.
Бди о душе́ моя́! Изря́дствуй я́коже дре́вле вели́кий в патриа́рсех, да стя́жеши дея́ние с ра́зумом, да бу́деши ум зряй Бо́га и дости́гнеши незаходя́щий мрак в виде́нии, и бу́деши вели́кий купе́ц.
Поми́луй мя, Бо́же, поми́луй мя.
Двана́десять патриа́рхов, вели́кий в патриа́рсех детотвори́в, та́йно утверди́ тебе́ ле́ствицу де́ятельнаго душе́ моя́ восхожде́ния: де́ти, я́ко основа́ния: степе́ни, я́ко восхожде́ния, прему́дренно подложи́в.
Поми́луй мя, Бо́же, поми́луй мя.
Иса́ва возненави́деннаго подража́ла еси́ душе́, отдала́ еси́ преле́стнику твоему́ пе́рвыя добро́ты пе́рвенство, и оте́ческия моли́твы отпа́ла еси́, и два́жды поползну́лася еси́ окая́нная, дея́нием и ра́зумом: те́мже ны́не пока́йся.
Поми́луй мя, Бо́же, поми́луй мя.
Едо́м Иса́в нарече́ся, кра́йняго ра́ди женонеи́стовнаго смеше́ния: невоздержа́нием бо при́сно разжига́емь, и сластьми́ оскверня́емь, Едо́м именова́ся, е́же глаго́лется разжже́ние души́ любогрехо́вныя.
Поми́луй мя, Бо́же, поми́луй мя.
Иова на гно́ищи слы́шавши, о душе́ моя́, оправда́вшагося, того́ му́жеству не поревнова́ла еси́, тве́рдаго не име́ла еси́ предложе́ния, во всех я́же ве́си, и и́миже искуси́лася еси́, но яви́лася еси́ нетерпели́ва.
Поми́луй мя, Бо́же, поми́луй мя.
Иже пе́рвее на престо́ле, наг ны́не на гно́ищи гно́ен: мно́гий в ча́дех и сла́вный, безча́ден и бездо́мок напра́сно: пала́ту у́бо гно́ище, и би́серие стру́пы вменя́ше.
Поми́луй мя, Бо́же, поми́луй мя.
Ца́рским досто́инством, венце́м и багряни́цею оде́ян, многоиме́нный челове́к и пра́ведный бога́тством кипя́ и ста́ды, внеза́пу бога́тства, сла́вы ца́рства обнища́в лиши́ся.
Поми́луй мя, Бо́же, поми́луй мя.
Аще пра́веден бя́ше он, и непоро́чен па́че всех, и не убеже́ ловле́ния льсти́ваго и се́ти; ты же грехолюби́ва су́щи окая́нная душе́, что сотвори́ши, а́ще чесо́му о недове́домых случи́тся наити́ тебе́?
Поми́луй мя, Бо́же, поми́луй мя.
Те́ло оскверни́ся, дух окаля́ся, весь острупи́хся, но я́ко врач Христе́, обоя́ покая́нием мои́м уврачу́й, омы́й, очи́сти, покажи́ Спа́се мой, па́че сне́га чисте́йша.
Поми́луй мя, Бо́же, поми́луй мя.
Те́ло Твое́ и кровь распина́емый о всех положи́л еси́ Сло́ве: те́ло у́бо, да мя обнови́ши, кровь, да омы́еши мя. Дух же пре́дал еси́, да мя приведе́ши Христе́, Твоему́ Роди́телю.
Поми́луй мя, Бо́же, поми́луй мя.
Соде́лал еси́ спасе́ние посреде́ земли́ Ще́дре, да спасе́мся. Во́лею на дре́ве распя́лся еси́. Еде́м затворе́нный отве́рзеся, го́рняя и до́льняя тварь, язы́цы вси спасе́ни покланя́ются Тебе́.
Поми́луй мя, Бо́же, поми́луй мя.
Да бу́дет ми купе́ль, кровь из ребр Твои́х, вку́пе и питие́, источи́вшее во́ду оставле́ния, да обою́ду очища́юся, помазу́яся и пия́: я́ко пома́зание и питие́ Сло́ве, живото́чная Твоя́ словеса́.
Поми́луй мя, Бо́же, поми́луй мя.
Наг есмь черто́га, наг есмь и бра́ка, ку́пно и ве́чери; свети́льник угасе́, я́ко безъеле́йный, черто́г заключи́ся мне спя́щу, ве́черя снеде́ся, аз же по руку́ и но́гу свя́зан, вон низве́ржен есмь.
Поми́луй мя, Бо́же, поми́луй мя.
Ча́шу Це́рковь стяжа́, ре́бра Твоя́ живоно́сная, из ни́хже сугу́быя нам источи́ то́ки, оставле́ния и ра́зума, во о́браз дре́вняго и но́ваго двои́х вку́пе заве́тов, Спа́се наш.
Поми́луй мя, Бо́же, поми́луй мя.
Вре́мя живота́ моего́ ма́ло, и испо́лнено боле́зней и лука́вства, но в покая́нии мя приими́, и в ра́зум призови́, да не бу́ду стяжа́ние, ни бра́шно чужде́му, Спа́се, Сам мя уще́дри.
Поми́луй мя, Бо́же, поми́луй мя.
Высокоглаго́лив ны́не есмь, жесто́к же и се́рдцем, вотще́ и всу́е, да не с фарисе́ем осу́диши мя. Па́че же мытаре́во смире́ние пода́ждь ми Еди́не Ще́дре, Правосу́де, и сему́ мя сочисли́.
Поми́луй мя, Бо́же, поми́луй мя.
Согреши́х, досади́в сосу́ду пло́ти моея́, вем Ще́дре, но в покая́нии мя приими́, и в ра́зум призови́, да не бу́ду стяжа́ние, ни бра́шно чужде́му, Спа́се, Сам мя уще́дри.
Поми́луй мя, Бо́же, поми́луй мя.
Самоистука́н бых страстьми́, ду́шу мою́ вредя́ Ще́дре, но в покая́нии мя приими́, и в ра́зум призови, да не бу́ду стяжа́ние, ни бра́шно чужде́му, Спа́се, Сам мя уще́дри.
Поми́луй мя, Бо́же, поми́луй мя.
Не послу́шах гла́са Твоего́, преслу́шах писа́ние Твое́ законополо́жника, но в покая́нии мя приими́, и в ра́зум призови́, да не бу́ду стяжа́ние, ни бра́шно чужде́му, Спа́се, Сам мя уще́дри.
Преподо́бная ма́ти Мари́е, моли́ Бо́га о нас.
Безпло́тных жи́тельство в пло́ти преходя́щи, благода́ть преподо́бная к Бо́гу ве́лию вои́стинну прия́ла еси́, ве́рно о чту́щих тя предста́тельствуй. Те́мже мо́лим тя, от вся́ких напа́стей и нас моли́твами твои́ми изба́ви.
Преподо́бная ма́ти Мари́е, моли́ Бо́га о нас.
Вели́ких безме́стий во глубину́ низве́дшися, неодержи́ма была́ еси́, но востекла́ еси́ по́мыслом лу́чшим, к кра́йней дея́ньми я́ве доброде́тели пресла́вно, а́нгельское естество́ Мари́е, удиви́вши.
Преподо́бне о́тче Андре́е, моли́ Бо́га о нас.
Андре́е, оте́ческая похвало́, моли́твами твои́ми не преста́й моля́ся, предстоя́ Тро́ице Пребоже́ственней, я́ко да изба́вимся муче́ния, любо́вию предста́теля тя боже́ственнаго всеблаже́нне призыва́ющии, Кри́ту удобре́ние.
Сла́ва Отцу́ и Сы́ну и Свято́му Ду́ху.
Троичен: Неразде́льное существо́м, несли́тное Ли́цы, богосло́влю Тя Тро́ическое Еди́но Божество́, я́ко Единоца́рственное и Сопресто́льное, вопию́ Ти песнь вели́кую, в вы́шних трегу́бо песносло́вимую.
И ны́не и при́сно и во ве́ки веко́в. Ами́нь.
Богородичен: И ражда́еши, и де́вствуеши, и пребыва́еши обою́ду естество́м Де́ва, Рожде́йся обновля́ет зако́ны естества́, утро́ба же ражда́ет неражда́ющая. Бог иде́же хо́щет, побежда́ется естества́ чин: твори́т бо ели́ка хо́щет.
Песнь 5
Ирмос: От нощи́ у́тренююща, Человеколю́бче, просвети́, молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́.
Поми́луй мя, Бо́же, поми́луй мя.
В нощи́ житие́ мое́ преидо́х при́сно, тьма бо бысть и глубока́ мне мгла, нощь греха́, но я́ко дне сы́на Спа́се покажи́ мя.
Поми́луй мя, Бо́же, поми́луй мя.
Руви́ма подража́я окая́нный аз, соде́ях беззако́нный и законопресту́пный сове́т на Бо́га Вы́шняго, оскверни́в ло́же мое́, я́ко о́тчее он.
Поми́луй мя, Бо́же, поми́луй мя.
Испове́даюся Тебе́ Христе́ Царю́, согреши́х, согреши́х, я́ко пре́жде Ио́сифа бра́тия прода́вшии, чистоты́ плод и целому́дрия.
Поми́луй мя, Бо́же, поми́луй мя.
От сро́дников пра́ведная душа́ связа́ся, прода́ся в рабо́ту сла́дкий, во о́браз Госпо́день: ты же вся душе́, продала́ся еси́ злы́ми твои́ми.
Поми́луй мя, Бо́же, поми́луй мя.
Ио́сифа пра́веднаго и целому́дреннаго ума́ подража́й окая́нная, и неиску́сная душе́, и не оскверня́йся безслове́сными стремле́ньми при́сно беззако́ннующи.
Поми́луй мя, Бо́же, поми́луй мя.
Аще и в ро́ве поживе́ иногда́ Ио́сиф, Влады́ко Го́споди, но во о́браз погребе́ния и воста́ния Твоего́, аз же что Тебе́ когда́ сицево́е принесу́?
Поми́луй мя, Бо́же, поми́луй мя.
Моисе́ов слы́шала еси́ ковче́жец душе́, вода́ми, волна́ми носи́м ре́чными, я́ко в черто́зе дре́вле бе́гающий де́ла го́рькаго сове́та фараони́тска.
Поми́луй мя, Бо́же, поми́луй мя.
Аще ба́бы слы́шала еси́, убива́ющия иногда́ безвозра́стное му́жеское, душе́ окая́нная, целому́дрия дея́ние, ны́не я́ко вели́кий Моисе́й, сси прему́дрость.
Поми́луй мя, Бо́же, поми́луй мя.
Яко Моисе́й вели́кий еги́птянина, ума́ уязви́вши окая́нная, не уби́ла еси́ душе́: и ка́ко всели́шися, глаго́ли, в пусты́ню страсте́й покая́нием?
Поми́луй мя, Бо́же, поми́луй мя.
В пусты́ню всели́ся вели́кий Моисе́й, гряди́ у́бо подража́й того́ житие́, да и в купине́ богоявле́ния душе́, в виде́нии бу́деши.
Поми́луй мя, Бо́же, поми́луй мя.
Моисе́ов жезл вообража́й душе́, ударя́ющий мо́ре, и огустева́ющий глубину́, во о́браз Креста́ Боже́ственнаго: и́мже мо́жеши и ты вели́кая соверши́ти.
Поми́луй мя, Бо́же, поми́луй мя.
Ааро́н приноша́ше огнь Бо́гу, непоро́чный, неле́стный: но Офни́ и Финее́с, я́ко ты душе́, приноша́ху чужде́е Бо́гу оскверне́нное житие́.
Поми́луй мя, Бо́же, поми́луй мя.
Яко тя́жкий нра́вом, фарао́ну го́рькому бых Влады́ко, Ианни́, и Иамври́, душе́ю и те́лом, и погруже́н умо́м, но помози́ ми.
Поми́луй мя, Бо́же, поми́луй мя.
Ка́лу примеси́хся окая́нный умо́м, омы́й мя Влады́ко, ба́нею мои́х слез, молю́ Тя, пло́ти моея́ оде́жду убели́в я́ко снег.
Поми́луй мя, Бо́же, поми́луй мя.
Аще испыта́ю моя́ дела́ Спа́се, вся́каго челове́ка превозше́дша греха́ми себе́ зрю, я́ко ра́зумом му́дрствуяй согреши́х, не неве́дением.
Поми́луй мя, Бо́же, поми́луй мя.
Пощади́ пощади́ Го́споди, созда́ние Твое́, согреши́х, осла́би ми, я́ко естество́м чи́стый Сам сый еди́н, и ин ра́зве Тебе́ никто́же есть кроме́ скве́рны.
Поми́луй мя, Бо́же, поми́луй мя.
Мене́ ра́ди Бог сый, вообрази́лся еси́ в мя, показа́л еси́ чудеса́, исцели́в прокаже́нныя, и разсла́бленнаго стягну́в, кровоточи́выя ток уста́вил еси́ Спа́се, прикоснове́нием риз.
Поми́луй мя, Бо́же, поми́луй мя.
Кровоточи́вую подража́й окая́нная душе́, притецы́, удержи́ оме́ты Христо́вы, да изба́вишися ран, и услы́шиши от Него́: ве́ра твоя́ спасе́ тя.
Поми́луй мя, Бо́же, поми́луй мя.
Ни́зу снича́щую подража́й о душе́, прииди́, припади́ к нога́ма Иису́совыма, да тя испра́вит, и да хо́диши пра́во стези́ Госпо́дни.
Поми́луй мя, Бо́же, поми́луй мя.
Аще и кла́дязь еси́ глубо́кий Влады́ко, источи́ ми во́ду из пречи́стых Твои́х жил, да я́ко самаряны́ня, не ктому́ пия́й жа́жду: жи́зни бо струи́ источа́еши.
Поми́луй мя, Бо́же, поми́луй мя.
Силоа́м да бу́дут ми сле́зы моя́, Влады́ко Го́споди, да умы́ю и аз зе́ницы се́рдца, и ви́жду Тя у́мно, Све́та преве́чна.
Преподо́бная ма́ти Мари́е, моли́ Бо́га о нас.
Несравне́нным жела́нием всебога́тая, Дре́ву возжеле́вши поклони́тися живо́тному, сподо́билася еси́ жела́ния, сподо́би у́бо и мене́ улучи́ти вы́шния сла́вы.
Преподо́бная ма́ти Мари́е, моли́ Бо́га о нас.
Струи́ Иорда́нския преше́дши, обрела́ еси́ поко́й безболе́зненный, пло́ти сла́сти избежа́вши, ея́же и нас изми́ твои́ми моли́твами преподо́бная.
Преподо́бне о́тче Андре́е, моли́ Бо́га о нас.
Яко па́стырей изря́днейша, Андре́е прему́дре, избра́нна су́ща тя, любо́вию ве́лию и стра́хом молю́, твои́ми моли́твами спасе́ние улучи́ти, и жизнь ве́чную.
Сла́ва Отцу́ и Сы́ну и Свято́му Ду́ху.
Троичен: Тя Тро́ице сла́вим, Еди́наго Бо́га, Свят, Свят, Свят еси́ Отче, Сы́не и Ду́ше, Про́стое Существо́, Еди́нице при́сно покланя́емая.
И ны́не и при́сно и во ве́ки веко́в. Ами́нь.
Богородичен: Из Тебе́ облече́ся в мое́ смеше́ние, нетле́нная безму́жная Ма́ти Де́во, Бог созда́вый ве́ки, и соедини́ Себе́ челове́ческое естество́.
Песнь 6
Ирмос: Возопи́х всем се́рдцем мои́м к ще́дрому Бо́гу, и услы́ша мя от а́да преиспо́дняго, и возведе́ от тли живо́т мой.
Поми́луй мя, Бо́же, поми́луй мя.
Сле́зы Спа́се о́чию мое́ю, и из глубины́ воздыха́ния чи́сте приношу́, вопию́щу се́рдцу: Бо́же, согреши́х Ти очи́сти мя.
Поми́луй мя, Бо́же, поми́луй мя.
Уклони́лася еси́ душе́, от Го́спода твоего́, я́коже Дафа́н и Авиро́н: но пощади́, воззови́ из а́да преиспо́дняго, да не про́пасть земна́я тебе́ покры́ет.
Поми́луй мя, Бо́же, поми́луй мя.
Яко ю́ница душе́ разсвире́певшая, уподо́билася еси́ Ефре́му, я́ко се́рна от тене́т сохрани́ житие́, впери́вши дея́нием ум, и зре́нием.
Поми́луй мя, Бо́же, поми́луй мя.
Рука́ нас Моисе́ова да уве́рит душе́, ка́ко мо́жет Бог прокаже́нное житие́ убели́ти, и очи́стити, и не отча́йся сама́ себе́, а́ще и прокаже́нна еси́.
Поми́луй мя, Бо́же, поми́луй мя.
Во́лны Спа́се прегреше́ний мои́х я́ко в мо́ри Чермне́м возвраща́ющеся, покры́ша мя внеза́пу, я́ко еги́птяны иногда́, и триста́ты.
Поми́луй мя, Бо́же, поми́луй мя.
Неразу́мное душе́ произволе́ние име́ла еси́, я́ко пре́жде Изра́иль: Боже́ственныя бо ма́нны предсуди́ла еси́ безслове́сно, любосла́стное страсте́й объяде́ние.
Поми́луй мя, Бо́же, поми́луй мя.
Кладенцы́ душе́, предпочла́ еси́ ханане́йских мы́слей, па́че жи́лы ка́мене, из него́же прему́дрости река́, я́ко ча́ша пролива́ет то́ки богосло́вия.
Поми́луй мя, Бо́же, поми́луй мя.
Свина́я мяса́ и котлы́, и еги́петскую пи́щу, па́че небе́сныя предсуди́ла еси́ душе́ моя́, я́коже дре́вле неразу́мнии лю́дие в пусты́ни.
Поми́луй мя, Бо́же, поми́луй мя.
Яко уда́ри Моисе́й раб Твой жезло́м ка́мень, обра́зно животвори́вая ре́бра Твоя́ прообразова́ше, из ни́хже вси питие́ жи́зни Спа́се, почерпа́ем.
Поми́луй мя, Бо́же, поми́луй мя.
Испыта́й душе́ и смотряй, я́коже Иису́с Нави́н обетова́ния зе́млю, какова́ есть, и всели́ся в ню благозако́нием.
Поми́луй мя, Бо́же, поми́луй мя.
Воста́ни и побори́, я́ко Иису́с Амали́ка, плотски́я стра́сти, и гаваони́ты, ле́стныя по́мыслы при́сно побежда́ющи.
Поми́луй мя, Бо́же, поми́луй мя.
Прейди́ вре́мене теку́щее естество́, я́ко пре́жде ковче́г, и земли́ о́ныя бу́ди во одержа́нии обетова́ния душе́, Бог повелева́ет.
Поми́луй мя, Бо́же, поми́луй мя.
Яко спасл еси́ Петра́, возопи́вша спаси́, предвари́в мя Спа́се от зве́ря изба́ви, просте́р Твою́ ру́ку, и возведи́ из глубины́ грехо́вныя.
Поми́луй мя, Бо́же, поми́луй мя.
Приста́нище Тя вем ути́шное, Влады́ко, Влады́ко Христе́, но от незаходи́мых глуби́н греха́, и отча́яния мя предвари́в изба́ви.
Поми́луй мя, Бо́же, поми́луй мя.
Аз есмь, Спа́се, ю́же погуби́л еси́ дре́вле ца́рскую дра́хму, но вжег свети́льник Предте́чу Твоего́ Сло́ве, взыщи́ и обря́щи Твой о́браз.
Преподо́бная ма́ти Мари́е, моли́ Бо́га о нас.
Да страсте́й пла́мень угаси́ши, слез ка́пли источи́ла еси́ при́сно Мари́е, душе́ю распаля́ема, и́хже благода́ть пода́ждь и мне, твоему́ рабу́.
Преподо́бная ма́ти Мари́е, моли́ Бо́га о нас.
Безстра́стие небе́сное стяжа́ла еси́, кра́йним на земли́ житие́м ма́ти. Те́мже тебе́ пою́щим, страсте́й изба́витися моли́твами твои́ми, моли́ся.
Преподо́бне о́тче Андре́е, моли́ Бо́га о нас.
Кри́тскаго тя па́стыря, и председа́теля, и вселе́нныя моли́твенника ве́дый, притека́ю Андре́е, и вопию́ ти: изми́ мя о́тче, из глубины́ греха́.
Сла́ва Отцу́ и Сы́ну и Свято́му Ду́ху.
Троичен: Тро́ица есмь про́ста, неразде́льна, разде́льна Ли́чне, и Еди́ница есмь Естество́м соедине́на, Оте́ц глаго́лет, и Сын, и Боже́ственный Дух.
И ны́не и при́сно и во ве́ки веко́в. Ами́нь.
Богородичен: Утро́ба Твоя́ Бо́га нам роди́, воображе́нна по нам: Его́же, я́ко Созда́теля всех, моли́ Богоро́дице, да Твои́ми моли́твами оправди́мся.
Ирмос: Возопи́х всем се́рдцем мои́м к ще́дрому Бо́гу, и услы́ша мя от а́да преиспо́дняго, и возведе́ от тли живо́т мой.
Кондак, глас 6:
Душе́ моя́, душе́ моя́, воста́ни, что спи́ши? Коне́ц приближа́ется, и и́маши смути́тися. Воспряни́ у́бо, да пощади́т тя Христо́с Бог, везде́ сый и вся́ исполня́яй.
Икос:
Христо́во врачевство́ ви́дя отве́рсто, и от сего́ Ада́му истека́ющее здра́вие, пострада́, уязви́ся диа́вол, и я́ко бе́дствуя рыда́ше, и свои́м друго́м возопи́: что сотворю́ Сы́ну Мари́ину, убива́ет мя Вифлее́млянин, Иже везде́ сый, и вся исполня́яй.
Блаженны, с поклонами, глас 6:
Во Ца́рствии Твое́м, помяни́ нас Го́споди.
Разбо́йника Христе́ рая́ жи́теля сотвори́л еси́, на кресте́ Тебе́ возопи́вша: помяни́ мя, того́ покая́нию сподо́би и мене́ недосто́йнаго.
Блаже́ни ни́щии ду́хом, я́ко тех есть Ца́рство Небе́сное.
Мано́я слы́шавши дре́вле душе́ моя́, Бо́га в явле́нии бы́вша, и из непло́дове тогда́ прие́мша плод обетова́ния, того́ благоче́стие подража́й.
Блаже́ни пла́чущии, я́ко ти́и уте́шатся.
Сампсо́новой поревнова́вши ле́ности, главу́ остри́гла еси́ душе́ дел твои́х, преда́вши иноплеме́нником, любосла́стием целому́дренную жизнь и блаже́нную.
Блаже́ни кро́тцыи, я́ко ти́и насле́дят зе́млю.
Пре́жде че́люстию о́слею победи́вый иноплеме́нники, ны́не плене́ние ласкосе́рдству стра́стному обре́теся, но избе́гни душе́ моя́ подража́ния, дея́ния и сла́бости.
Блаже́ни а́лчущии и жа́ждущии пра́вды, я́ко ти́и насы́тятся.
Вара́к и Иеффа́й военача́льницы, судии́ Изра́илевы предпочте́ни бы́ша, с ни́миже Дево́рра мужеу́мная: тех до́блестьми душе́ вмужи́вшися укрепи́ся.
Блаже́ни ми́лостивии, я́ко ти́и поми́ловани бу́дут.
Иаи́лино хра́брство позна́ла еси́ душе́ моя́, Сиса́ра дре́вле пробо́дшую, и спасе́ние соде́лавшую, дре́вом о́стрым, слы́шиши, и́мже тебе́ крест образу́ется.
Блаже́ни чи́стии се́рдцем, я́ко ти́и Бо́га у́зрят.
Пожри́ душе́ же́ртву похва́льную, дея́ние я́ко дщерь принеси́, от Иеффа́евы чисте́йшую, и заколи́ я́ко же́ртву, стра́сти плотски́я Го́сподеви твоему́.
Блаже́ни миротво́рцы, я́ко ти́и сы́нове Бо́жии нареку́тся.
Гедео́ново руно́ помышля́й душе́ моя́, с небесе́ ро́су подыми́, и прини́кни я́коже пес, и пий во́ду, от зако́на теку́щую, изгнете́нием пи́сменным.
Блаже́ни изгна́ни пра́вды ра́ди, я́ко тех есть Ца́рство Небе́сное.
Илии́ свяще́нника осужде́ние душе́ моя́ восприя́ла еси́, лише́нием ума́ приобре́тши стра́сти себе́, я́коже он ча́да, де́лати беззако́нная.
Блаже́ни есте́, егда́ поно́сят вам, и изжену́т, и реку́т всяк зол глаго́л на вы лжу́ще Мене́ ра́ди.
В судия́х Леви́т, небреже́нием свою́ жену́, двана́десятим коле́ном раздели́, душе́ моя́, да скве́рну обличи́т от Вениами́на беззако́нную.
Ра́дуйтеся и весели́теся, я́ко мзда ва́ша мно́га на небесе́х.
Любому́дренная Анна моля́щися, устне́ у́бо двиза́ше ко хвале́нию, глас же ея́ не слы́шашеся, но оба́че непло́дна су́щи, сы́на моли́твы ражда́ет досто́йна.
Помяни́ нас Го́споди, егда́ прии́деши во Ца́рствии Твое́м.
В судия́х спричте́ся Аннино порожде́ние, вели́кий Саму́ил, его́же воспита́ла Армафе́ма в дому́ Госпо́дни; тому́ поревну́й душе́ моя́, и суди́ пре́жде ине́х дела́ твоя́.
Помяни́ нас Влады́ко, егда́ прии́деши во Ца́рствии Твое́м.
Дави́д на ца́рство избра́н, ца́рски пома́зася ро́гом Боже́ственнаго ми́ра; ты у́бо душе́ моя́, а́ще хо́щеши вы́шняго Ца́рствия, ми́ром пома́жися слеза́ми.
Помяни́ нас Святы́й, егда́ прии́деши во Ца́рствии Твое́м.
Поми́луй созда́ние Твое́ Ми́лостиве, уще́дри руку́ Твое́ю творе́ние, и пощади́ вся согреши́вшия, и мене́ па́че всех, Твои́х презре́вшаго повеле́ний.
Сла́ва Отцу́ и Сы́ну и Свято́му Ду́ху.
Троичен: Безнача́льну, и рожде́нию же и происхожде́нию, Отцу́ покланя́юся ро́ждшему, Сы́на сла́влю рожде́ннаго, пою́ сопросия́вшаго Отцу́ же и Сы́ну, Ду́ха Свята́го.
И ны́не и при́сно и во ве́ки веко́в. Ами́нь.
Богородичен: Преесте́ственному Рождеству́ Твоему́ покланя́емся, по естеству́ сла́вы Младе́нца Твоего́ не разделя́юще Богороди́тельнице. Иже бо еди́н лице́м, сугу́быми испове́дуется естествы́.
Песнь 7
Ирмос: Согреши́хом, беззако́нновахом, непра́вдовахом пред Тобо́ю, ниже́ соблюдо́хом, ниже́ сотвори́хом, я́коже запове́дал еси́ нам; но не преда́ждь нас до конца́, отце́в Бо́же.
Поми́луй мя, Бо́же, поми́луй мя.
Согреши́х, беззако́нновах, и отверго́х за́поведь Твою́, я́ко во гресе́х произведо́хся и приложи́х я́звам стру́пы себе́; но Сам мя поми́луй, я́ко Благоутро́бен, отце́в Бо́же.
Поми́луй мя, Бо́же, поми́луй мя.
Та́йная се́рдца моего́ испове́дах Тебе́ Судии́ моему́, виждь мое́ смире́ние, виждь и скорбь мою́, и вонми́ суду́ моему́ ны́не, и Сам мя поми́луй, я́ко Благоутро́бен, отце́в Бо́же.
Поми́луй мя, Бо́же, поми́луй мя.
Сау́л иногда́ я́ко погуби́ отца́ своего́ душе́ осля́та, внеза́пу ца́рство обре́те к прослу́тию, но блюди́, не забыва́й себе́, ско́тския по́хоти твоя́ произво́ливши па́че Ца́рства Христо́ва.
Поми́луй мя, Бо́же, поми́луй мя.
Дави́д иногда́ Богооте́ц, а́ще и согреши́ сугу́бо душе́ моя́, стрело́ю у́бо устреле́н быв прелюбоде́йства, копие́м же плене́н быв уби́йства томле́нием, но ты сама́ тяжча́йшими де́лы неду́гуеши, самохо́тными стремле́ньми.
Поми́луй мя, Бо́же, поми́луй мя.
Совокупи́ у́бо Дави́д иногда́ беззако́нию беззако́ние: уби́йству же любоде́йство раствори́в, покая́ние сугу́бое показа́ а́бие; но сама́ ты лука́внейшая душе́ соде́лала еси́, не пока́явшися Бо́гу.
Поми́луй мя, Бо́же, поми́луй мя.
Дави́д иногда́ вообрази́, списа́в я́ко на ико́не песнь, е́юже дея́ние облича́ет, е́же соде́я, зовы́й: поми́луй мя. Тебе́ бо Еди́ному согреши́х всех Бо́гу, Сам очи́сти мя.
Поми́луй мя, Бо́же, поми́луй мя.
Киво́т я́ко ноша́шеся на колесни́це, Зан о́ный, егда́ превра́щшуся тельцу́, то́чию косну́ся, Бо́жиим искуси́ся гне́вом; но того́ дерзнове́ния убежа́вши душе́, почита́й Боже́ственная че́стне.
Поми́луй мя, Бо́же, поми́луй мя.
Слы́шала еси́ Авессало́ма, ка́ко на естество́ воста́, позна́ла еси́ того́ скве́рная дея́ния, и́миже оскверни́ ло́же Дави́да отца́; но ты подража́ла еси́ того́ стра́стная и любосла́стная стремле́ния.
Поми́луй мя, Бо́же, поми́луй мя.
Покори́ла еси́ нерабо́тное твое́ досто́инство те́лу твоему́: ино́го бо Ахитофе́ла обре́тши врага́, душе́, снизшла́ еси́ сего́ сове́том, но сия́ разсы́па Сам Христо́с, да ты вся́ко спасе́шися.
Поми́луй мя, Бо́же, поми́луй мя.
Соломо́н чу́дный, и благода́ти прему́дрости испо́лненный, сей лука́вое иногда́ пред Бо́гом сотвори́в, отступи́ от Него́; ему́же ты прокля́тым твои́м житие́м, душе́ уподо́билася еси́.
Поми́луй мя, Бо́же, поми́луй мя.
Сластьми́ влеко́мь страсте́й свои́х оскверня́шеся, увы́ мне, рачи́тель прему́дрости, рачи́тель блу́дных жен, и стра́нен от Бо́га; его́же ты подража́ла еси́ умо́м о душе́, сладостра́стьми скве́рными.
Поми́луй мя, Бо́же, поми́луй мя.
Ровоа́му поревнова́ла еси́ не послу́шавшему сове́та о́тча, ку́пно же и зле́йшему рабу́ Иеровоа́му, пре́жнему отсту́пнику душе́, но бе́гай подража́ния, и зови́ Бо́гу: согреши́х, уще́дри мя.
Поми́луй мя, Бо́же, поми́луй мя.
Ахаа́вовым поревнова́ла еси́ скве́рнам, душе́ моя́, увы мне, была́ еси́ плотски́х скверн пребыва́лище, и сосу́д сра́млен страсте́й, но из глубины́ твоея́ воздохни́, и глаго́ли Бо́гу грехи́ твоя́.
Поми́луй мя, Бо́же, поми́луй мя.
Попали́ Илия́ иногда́ два́щи пятьдеся́т Иезаве́линых, егда́ сту́дныя проро́ки погуби́, во обличе́ние Ахаа́вово, но бе́гай подража́ния двою́ душе́, и укрепля́йся.
Поми́луй мя, Бо́же, поми́луй мя.
Заключи́ся тебе́ не́бо душе́, и глад Бо́жий пости́же тя, егда́ Илии́ Фесви́тянина я́коже Ахаа́в, не покори́ся словесе́м иногда́, но Сара́ффии уподо́бися, напита́й проро́чу ду́шу.
Поми́луй мя, Бо́же, поми́луй мя.
Манасси́ева собрала́ еси́ согреше́ния изволе́нием, поста́вльши я́ко ме́рзости стра́сти, и умно́живши душе́ негодова́ние, но того́ покая́нию ревну́ющи те́пле, стяжи́ умиле́ние.
Поми́луй мя, Бо́же, поми́луй мя.
Припа́даю Ти, и приношу́ Тебе́, я́коже сле́зы глаго́лы моя́: согреши́х, я́ко не согреши́ блудни́ца, и безако́нновах, я́ко и́ный никто́же на земли́, но уще́дри Влады́ко, творе́ние Твое́, и воззови́ мя.
Поми́луй мя, Бо́же, поми́луй мя.
Погребо́х о́браз Твой, и растли́х за́поведь Твою́, вся помрачи́ся добро́та, и страстьми́ угаси́ся, Спа́се, свеща́, но уще́дрив возда́ждь ми я́коже пое́т Дави́д, ра́дование.
Поми́луй мя, Бо́же, поми́луй мя.
Обрати́ся, пока́йся, откры́й сокрове́нная, глаго́ли Бо́гу вся ве́дущему: Ты ве́си моя́ та́йная, еди́не Спа́се, но Сам мя поми́луй, я́коже пое́т Дави́д по ми́лости Твое́й.
Поми́луй мя, Бо́же, поми́луй мя.
Исчезо́ша дни́и мои́, я́ко со́ние востаю́щаго; те́мже я́ко Езеки́я слезю́ на ло́жи мое́м, приложи́тися мне ле́том живота́, но кий Иса́иа предста́нет тебе́ душе́, а́ще не всех Бог?
Преподо́бная ма́ти Мари́е, моли́ Бо́га о нас.
Возопи́вши к Пречи́стей Богома́тери, пе́рвее отри́нула еси́ неи́стовство страсте́й, ну́жно стужа́ющих, и посрами́ла еси́ врага́ запе́ншаго, но даждь ны́не по́мощь от ско́рби, и мне, рабу́ твоему́.
Преподо́бная ма́ти Мари́е, моли́ Бо́га о нас.
Его́же возлюби́ла еси́, Его́же возжеле́ла еси́, Его́же ра́ди плоть изнури́ла еси́ преподо́бная, моли́ ны́не Христа́ о рабе́х: я́ко да ми́лостив быв всем нам, ми́рное состоя́ние да́рует почита́ющим Его́.
Преподо́бне о́тче Андре́е, моли́ Бо́га о нас.
На ка́мени мя ве́ры моли́твами твои́ми утверди́ о́тче, стра́хом мя Боже́ственным огражда́я, и покая́ние Андре́е, пода́ждь ми, молю́ся ти, и изба́ви мя от се́ти враго́в и́щущих мя.
Сла́ва Отцу́ и Сы́ну и Свято́му Ду́ху.
Троичен: Тро́ице Про́стая, Неразде́льная, Единосу́щная, и Естество́ Еди́но, Све́тове, и Свет, и Свята Три, и Еди́но Свя́то пое́тся Бог Тро́ица; но воспо́й, просла́ви, Живо́т и Животы́, душе́, всех Бо́га.
И ны́не и при́сно и во ве́ки веко́в. Ами́нь.
Богородичен: Пое́м Тя, благослови́м Тя, покланя́емся Ти Богороди́тельнице, я́ко неразде́льныя Тро́ицы породи́ла еси́ еди́наго Христа́ Бо́га и Сама́ отве́рзла еси́ нам су́щим на земли́ небе́сная.
Трипеснец, глас 8:
Песнь 8
Ирмос: Безнача́льнаго Царя́ сла́вы, Его́же трепе́щут небе́сныя си́лы, по́йте свяще́нницы, лю́дие превозноси́те во вся ве́ки.
Святи́и апо́столи, моли́те Бо́га о нас.
Яко у́глие невеще́ственнаго огня́, попали́те веще́ственныя стра́сти моя́, возжиза́юще ны́не во мне жела́ние Боже́ственныя любве́, апо́столи.
Святи́и апо́столи, моли́те Бо́га о нас.
Трубы́ благогла́сныя Сло́ва почти́м, и́миже падо́ша сте́ны неутвержде́ны вра́жия, и богоразу́мия утверди́шася забра́ла.
Святи́и апо́столи, моли́те Бо́га о нас.
Куми́ры стра́стныя души́ моея́ сокруши́те, и́же хра́мы и столпы́ сокруши́сте врага́, апо́столи Госпо́дни, хра́мове освяще́ннии.
Пресвята́я Богоро́дице, спаси́ нас.
Вмести́ла еси́ Невмести́маго естество́м, носи́ла еси́ Нося́щаго вся, дои́ла еси́ Чи́стая, пита́ющаго тварь, Христа́ Жизнода́вца.
Иный трипеснец
Ирмос: Безнача́льнаго Царя́ сла́вы, Его́же трепе́щут небе́сныя си́лы, по́йте свяще́нницы, лю́дие превозноси́те во вся ве́ки.
Святи́и апо́столи, моли́те Бо́га о нас.
Ду́ха началохи́тростием созда́вше всю Це́рковь апо́столи Христо́вы, в ней благослови́те Христа́ во ве́ки.
Святи́и апо́столи, моли́те Бо́га о нас.
Воструби́вше трубо́ю уче́ний, низверго́ша апо́столи всю лесть и́дольскую, Христа́ превознося́ще во вся ве́ки.
Святи́и апо́столи, моли́те Бо́га о нас.
Апо́столи, до́брое преселе́ние, назира́телие ми́ра, и небе́снии жи́телие, вас при́сно восхваля́ющия, изба́вите от бед.
Пресвята́я Тро́ице Бо́же наш, сла́ва Тебе́.
Трисо́лнечное Всесве́тлое Богонача́лие, Единосла́вное и Единопресто́льное Естество́, Отче Вседе́телю, Сы́не, и Боже́ственный Ду́ше, пою́ Тя во ве́ки.
Пресвята́я Богоро́дице, спаси́ нас.
Яко честны́й и превы́шший престо́л, воспои́м Бо́жию Ма́терь непреста́нно, лю́дие, еди́ну по рождестве́ Ма́терь и Де́ву.
Ирмос: Его́же во́инства небе́сная сла́вят, и трепе́щут Херуви́ми и Серафи́ми, вся́ко дыха́ние и тварь, по́йте, благослови́́те и превозноси́те во вся ве́ки.
Поми́луй мя, Бо́же, поми́луй мя.
Согреши́вша Спа́се поми́луй, воздви́гни мой ум ко обраще́нию, приими́ мя ка́ющагося, уще́дри вопию́ща: согреши́х Ти, спаси́, беззако́нновах, поми́луй мя.
Поми́луй мя, Бо́же, поми́луй мя.
Колесни́чник Илия́, колесни́цею доброде́телей вшед, я́ко на небеса́, ноша́шеся превы́ше иногда́ от земны́х; сего́ у́бо душе́ моя́, восхо́д помышля́й.
Поми́луй мя, Бо́же, поми́луй мя.
Иорда́нова струя́ пе́рвее, ми́лотию Илиино́ю Елиссе́ем, ста сю́ду и сю́ду; ты же, о душе́ моя́, сея́ не причасти́лася еси́ благода́ти за невоздержа́ние.
Поми́луй мя, Бо́же, поми́луй мя.
Елиссе́й иногда́ прие́м ми́лоть Илиину́, прия́т сугу́бую благода́ть от Бо́га; ты же о душе́ моя́, сея́ не причасти́лася еси́ благода́ти за невоздержа́ние.
Поми́луй мя, Бо́же, поми́луй мя.
Сомани́тида иногда́ пра́веднаго учреди́, о душе́, нра́вом благи́м; ты же не ввела́ еси́ в дом, ни стра́нна, ни пу́тника. Те́мже черто́га изри́нешися вон, рыда́ющи.
Поми́луй мя, Бо́же, поми́луй мя.
Гиези́ев подража́ла еси́ окая́нная ра́зум скве́рный всегда́ душе́, его́же сребролю́бие отложи́ поне́ на ста́рость; бе́гай гее́нскаго огня́, отступи́вши злых твои́х.
Поми́луй мя, Бо́же, поми́луй мя.
Ты Ози́и душе́ поревнова́вши, сего́ прокаже́ние в себе́ стяжа́ла еси́ сугу́бо; безме́стная бо мы́слиши, беззако́нная же де́еши; оста́ви я́же и́маши, и притецы́ к покая́нию.
Поми́луй мя, Бо́же, поми́луй мя.
Ниневи́тяны душе́ слы́шала еси́ ка́ющияся Бо́гу, вре́тищем и пе́пелом, сих не подража́ла еси́, но яви́лася еси́ зле́йшая всех, пре́жде зако́на, и по зако́не прегреши́вших.
Поми́луй мя, Бо́же, поми́луй мя.
В ро́ве бла́та слы́шала еси́ Иереми́ю душе́, гра́да Сио́ня рыда́ньми вопию́ща, и слез и́щуща; подража́й сего́ плаче́вное житие́ и спасе́шися.
Поми́луй мя, Бо́же, поми́луй мя.
Ио́на в Фарси́с побеже́, проразуме́в обраще́ние ниневи́тянов, разуме́ бо я́ко проро́к Бо́жие благоутро́бие; те́мже ревнова́ше проро́честву не солга́тися.
Поми́луй мя, Бо́же, поми́луй мя.
Дании́ла в ро́ве слы́шала еси́, ка́ко загради́ уста́, о душе́ звере́й; уве́дела еси́, ка́ко о́троцы и́же о Аза́рии, погаси́ша ве́рою пе́щи пла́мень горя́щий.
Поми́луй мя, Бо́же, поми́луй мя.
Ве́тхаго Заве́та вся приведо́х ти душе́, к подо́бию, подража́й пра́ведных боголюби́вая дея́ния, избе́гни же па́ки лука́вых грехо́в.
Поми́луй мя, Бо́же, поми́луй мя.
Правосу́де Спа́се поми́луй, и изба́ви мя огня́, и преще́ния, е́же и́мам на суде́ пра́ведно претерпе́ти; осла́би ми пре́жде конца́, доброде́телию и покая́нием.
Поми́луй мя, Бо́же, поми́луй мя.
Яко разбо́йник вопию́ Ти: помяни́ мя, я́ко Петр пла́чу го́рце: осла́би ми Спа́се; зову́ я́ко мыта́рь: слезю́ я́ко блудни́ца; приими́ мое́ рыда́ние, я́коже иногда́ ханане́ино.
Поми́луй мя, Бо́же, поми́луй мя.
Гное́ние, Спа́се, исцели́ смире́нныя моея́ души́, Еди́не Врачу́, пла́стырь мне наложи́, и еле́й и вино́, дела́ покая́ния, умиле́ние со слеза́ми.
Поми́луй мя, Бо́же, поми́луй мя.
Ханане́ю и аз подража́я, поми́луй мя, вопию́, Сы́не Дави́дов; каса́юся кра́я ри́зы, я́ко кровоточи́вая, пла́чу, я́ко Ма́рфа и Мари́я над Ла́зарем.
Поми́луй мя, Бо́же, поми́луй мя.
Сле́зную Спа́се сткля́ницу, я́ко ми́ро истощава́я на главу́, зову́ Ти я́коже блудни́ца, ми́лости и́щущая, мольбу́ приношу́, и оставле́ние прошу́ прия́ти.
Поми́луй мя, Бо́же, поми́луй мя.
Аще и никто́же, я́коже аз согреши́ Тебе́, но оба́че приими́ и мене́, Благоутро́бне Спа́се, стра́хом ка́ющася, и любо́вию зову́ща: согреши́х Тебе́ Еди́ному, поми́луй мя Ми́лостиве.
Поми́луй мя, Бо́же, поми́луй мя.
Пощади́ Спа́се Твое́ созда́ние, и взыщи́ я́ко Па́стырь поги́бшее, предвари́ заблу́ждшаго, восхи́ти от во́лка, сотвори́ мя овча́ на па́стве Твои́х ове́ц.
Поми́луй мя, Бо́же, поми́луй мя.
Егда́ Судие́ ся́деши я́ко благоутро́бен, и пока́жеши стра́шную сла́ву Твою́ Спа́се, о каковы́й страх тогда́, пе́щи горя́щей, всем боя́щимся нестерпи́маго суди́ща Твоего́.
Преподо́бная ма́ти Мари́е, моли́ Бо́га о нас.
Све́та незаходи́маго Ма́ти, тя просвети́вши, от омраче́ния страсте́й разреши́. Те́мже вше́дши в духо́вную благода́ть, просвети́ Мари́е, тя ве́рно восхваля́ющия.
Преподо́бная ма́ти Мари́е, моли́ Бо́га о нас.
Чу́до но́во ви́дев, ужаса́шеся Боже́ственный в тебе́ вои́стинну ма́ти Зоси́ма: а́нгела бо зря́ше во пло́ти, и у́жасом весь исполня́шеся, Христа́ поя́ во ве́ки.
Преподо́бне о́тче Андре́е, моли́ Бо́га о нас.
Яко дерзнове́ние имы́й ко Го́споду, Андре́е Кри́тский честна́я похвало́, молю́, моли́ся разреше́ние от уз беззако́ния ны́не обрести́ мне моли́твами твои́ми, я́ко покая́ния учи́тель, и преподо́бных сла́ва.
Благослови́м Отца́, и Сы́на, и Свята́го Ду́ха, Го́спода.
Безнача́льне Отче, Сы́не Собезнача́льне, Уте́шителю Благи́й, Ду́ше Пра́вый, Сло́ва Бо́жия Роди́телю, Отца́ Безнача́льна Сло́ве, Ду́ше Живы́й и Зи́ждяй, Тро́ице Еди́нице, поми́луй мя.
И ны́не и при́сно и во ве́ки веко́в. Ами́нь.
Яко от оброще́ния червлени́цы Пречи́стая, у́мная багряни́ца Емману́илева, внутрь во чре́ве Твое́м плоть истка́ся; те́мже Богоро́дицу вои́стинну Тя почита́ем.
Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Ирмос: Его́же во́инства небе́сная сла́вят, и трепе́щут Херуви́ми и Серафи́ми, вся́ко дыха́ние и тварь, по́йте, благослови́́те и превозноси́те во вся ве́ки.
Трипеснец, глас 8:
Песнь 9
Ирмос: Вои́стинну Богоро́дицу Тя испове́дуем, спасе́ннии Тобо́ю Де́во Чи́стая, с безпло́тными ли́ки Тя велича́юще.
Святи́и апо́столи, моли́те Бо́га о нас.
Исто́чницы спаси́тельныя воды́ я́вльшеся апо́столи, иста́явшую ду́шу мою́ грехо́вною жа́ждою, ороси́те.
Святи́и апо́столи, моли́те Бо́га о нас.
Пла́вающаго в пучи́не поги́бели, и в погруже́нии уже́ бы́вша, Твое́ю десни́цею, я́коже Петра́, Го́споди спаси́ мя.
Святи́и апо́столи, моли́те Бо́га о нас.
Яко со́ли, вку́сных су́ще уче́ний, гни́льство ума́ моего́ изсуши́те, и неве́дения тьму отжени́те.
Пресвята́я Богоро́дице, спаси́ нас.
Ра́дость я́ко роди́вшая, плачь мне пода́ждь, и́мже Боже́ственное утеше́ние Влады́чице, в бу́дущем дни обрести́ возмогу́.
Иный канон
Ирмос: Тя небесе́ и земли́ Хода́таицу:
Святи́и апо́столи, моли́те Бо́га о нас.
Тя благосла́вное апо́стольское собра́ние, пе́сньми велича́ем: вселе́нней бо свети́ла све́тлая яви́стеся, пре́лесть отгоня́ще.
Святи́и апо́столи, моли́те Бо́га о нас.
Благове́стною мре́жею ва́шею, слове́сныя ры́бы улови́вше, сия́ приноси́те всегда́ снедь Христу́, апо́столи блаже́ннии.
Святи́и апо́столи, моли́те Бо́га о нас.
К Бо́гу ва́шим проше́нием помяни́те нас апо́столи, от вся́каго изба́витися искуше́ния, мо́лимся, любо́вию воспева́ющия вас.
Пресвята́я Тро́ице Бо́же наш, сла́ва Тебе́.
Тя Триипоста́сную Еди́ницу, Отче, Сы́не, со Ду́хом, Еди́наго Бо́га Единосу́щна пою́, Тро́ицу Единоси́льную и Безнача́льную.
Пресвята́я Богоро́дице, спаси́ нас.
Тя Детороди́тельницу и Де́ву, вси ро́ди ублажа́ем, я́ко Тобо́ю изба́вльшеся от кля́твы: ра́дость бо нам родила́ е́си Го́спода.
Великаго канона ирмос: Безсе́меннаго зача́тия рождество́ несказа́нное, Ма́тере безму́жныя нетле́нен плод, Бо́жие бо рожде́ние обновля́ет естества́; те́мже Тя вси ро́ди, я́ко Богоневе́стную Ма́терь, правосла́вно велича́ем.
Поми́луй мя, Бо́же, поми́луй мя.
Ум острупи́ся, те́ло оболе́знися, неду́гует дух, сло́во изнемо́же, житие́ умертви́ся, коне́ц при две́рех. Те́мже моя́ окая́нная душе́, что сотвори́ши, егда́ прии́дет Судия́ испыта́ти твоя́?
Поми́луй мя, Бо́же, поми́луй мя.
Моисе́ово приведо́х ти душе́, миробы́тие, и от того́ все заве́тное писа́ние, пове́дающее тебе́ пра́ведныя и непра́ведныя; от ни́хже вторы́я, о душе́, подража́ла еси́, а не пе́рвыя, в Бо́га согреши́вши.
Поми́луй мя, Бо́же, поми́луй мя.
Зако́н изнемо́же, пра́зднует Ева́нгелие, писа́ние же все в тебе́ небреже́но бысть, проро́цы изнемого́ша, и все пра́ведное сло́во; стру́пи твои́, о душе́, умно́жишася, не су́щу врачу́ исцеля́ющему тя.
Поми́луй мя, Бо́же, поми́луй мя.
Но́ваго привожду́ ти писа́ния указа́ния, вводя́щая тя душе́, ко умиле́нию; пра́ведным у́бо поревну́й, гре́шных же отвраща́йся, и уми́лостиви Христа́ моли́твами же и поще́ньми, и чистото́ю, и гове́нием.
Христо́с вочелове́чися, призва́в к покая́нию разбо́йники, и блудни́цы; душе́ пока́йся, дверь отве́рзеся Ца́рствия уже́, и предвосхища́ют е фарисе́е и мытари́ и прелюбоде́и ка́ющиися.
Поми́луй мя, Бо́же, поми́луй мя.
Христо́с вочелове́чися, пло́ти приобщи́вся ми, и вся, ели́ка суть естества́ хоте́нием испо́лни греха́ кроме́, подо́бие тебе́, о душе́, и о́браз предпоказу́я Своего́ снизхожде́ния.
Поми́луй мя, Бо́же, поми́луй мя.
Христо́с волхвы́ спасе́, па́стыри созва́, младе́нец мно́жества показа́ му́ченики, ста́рцы просла́ви, и ста́рыя вдови́цы, и́хже не поревнова́ла еси́ душе́, ни дея́нием, ни житию́, но го́ре тебе́, внегда́ бу́деши суди́тися.
Поми́луй мя, Бо́же, поми́луй мя.
Пости́вся Госпо́дь дний четы́редесять в пусты́ни, последи́ взалка́, показу́я челове́ческое;: душе́, да не разлени́шися, а́ще тебе́ приложи́тся враг, моли́твою же и посто́м от ног твои́х да отрази́тся.
Поми́луй мя, Бо́же, поми́луй мя.
Христо́с искуша́шеся, диа́вол искуша́ше, показу́я ка́мение, да хле́би бу́дут, на го́ру возведе́ ви́дети вся ца́рствия ми́ра во мгнове́нии; убо́йся о душе́, ловле́ния, трезви́ся моли́ся на вся́кий час Бо́гу.
Поми́луй мя, Бо́же, поми́луй мя.
Го́рлица пустынолю́бная, глас вопию́щаго возгласи́, Христо́в свети́льник, пропове́дуяй покая́ние, Ирод беззако́ннова со Иродиа́дою. Зри душе́ моя́, да не увя́знеши в беззако́нныя се́ти, но облобыза́й покая́ние.
Поми́луй мя, Бо́же, поми́луй мя.
В пусты́ню всели́ся благода́ти Предте́ча, и Иуде́я вся и Самари́я слы́шавше теча́ху, и испове́даху грехи́ своя́, креща́ющеся усе́рдно, и́хже ты не подража́ла еси́ душе́.
Поми́луй мя, Бо́же, поми́луй мя.
Брак у́бо честны́й, и ло́же нескве́рно, обоя́ бо Христо́с пре́жде благослови́, пло́тию яды́й, и в Ка́не же на бра́це во́ду в вино́ соверша́я, и показу́я пе́рвое чу́до, да ты измени́шися о душе́.
Поми́луй мя, Бо́же, поми́луй мя.
Разсла́бленнаго стя́гну Христо́с, одр взе́мша, и ю́ношу уме́рша воздви́же, вдови́че рожде́ние, и со́тнича о́трока, и самаряны́не яви́ся, в ду́се слу́жбу Тебе́, душе́ предживописа́.
Поми́луй мя, Бо́же, поми́луй мя.
Кровоточи́вую исцели́ прикоснове́нием кра́я ри́зна Госпо́дь, прокаже́нныя очи́сти: слепы́я и хромы́я просвети́в, испра́ви: глухи́я же и немы́я, и нича́щия ни́зу исцели́ сло́вом, да ты спасе́шися окая́нная душе́.
Поми́луй мя, Бо́же, поми́луй мя.
Неду́ги исцеля́я, ни́щим благовествова́ше, Христо́с Сло́во, вре́дныя уврачева́, с мытари́ ядя́ше, со гре́шники бесе́доваше, Иаи́ровы дще́ре ду́шу предуме́ршую возврати́ осяза́нием руки́.
Поми́луй мя, Бо́же, поми́луй мя.
Мыта́рь спаса́шеся, и блудни́ца целому́дрствоваше, и фарисе́й хваля́ся осужда́шеся. Ов у́бо, очи́сти мя, о́ва же, поми́луй мя. Сей же велича́шеся вопия́: Бо́же, благодарю́ Тя: и про́чия безу́мныя глаго́лы.
Поми́луй мя, Бо́же, поми́луй мя.
Закхе́й мыта́рь бе, но оба́че спаса́шеся, и фарисе́й Си́мон соблажня́шеся, и блудни́ца приима́ше оста́вительная разреше́ния, от Иму́щаго кре́пость оставля́ти грехи́, ю́же душе́ потщи́ся подража́ти.
Поми́луй мя, Бо́же, поми́луй мя.
Блудни́це, о окая́нная душе́ моя́, не поревнова́ла еси́, я́же прии́мши ми́ра алава́стр, со слеза́ми ма́заше но́зе Спа́сове, отре́ же власы́ дре́вних согреше́ний рукописа́ние раздира́ющаго ея́.
Поми́луй мя, Бо́же, поми́луй мя.
Гра́ды, и́мже даде́ Христо́с благове́стие, душе́ моя́, уве́дала еси́, ка́ко про́кляти бы́ша; убо́йся указа́ния, да не бу́деши я́коже о́ны, и́хже содо́мляном Влады́ко уподо́бив, да́же до а́да осуди́.
Поми́луй мя, Бо́же, поми́луй мя.
Да не го́ршая о душе́ моя́, яви́шися отча́янием, ханане́и ве́ру слы́шавшая, ея́же дщи сло́вом Бо́жиим исцели́ся; Поми́луй мя, Бо́же, поми́луй мя.
Сы́не Дави́дов, спаси́ и мене́, воззови́ из глубины́ се́рдца, я́коже она́ Христу́.
Поми́луй мя, Бо́же, поми́луй мя.
Умилосе́рдися спаси́ мя, Сы́не Дави́дов поми́луй, бесну́ющияся сло́вом исцели́вый, глас же благоутро́бный я́ко разбо́йнику мне рцы: ами́нь глаго́лю тебе́, со Мно́ю бу́деши в раи́, егда́ прииду́ во сла́ве Мое́й.
Поми́луй мя, Бо́же, поми́луй мя.
Разбо́йник оглаго́ловаше Тя, разбо́йник Богосло́вяше Тя, о́ба бо на кресте́ сви́сяста, но о Благоутро́бне, я́ко ве́рному разбо́йнику Твоему́, позна́вшему Тя Бо́га, и мне отве́рзи дверь сла́внаго Ца́рствия Твоего́.
Поми́луй мя, Бо́же, поми́луй мя.
Тварь содрога́шеся распина́ема Тя ви́дящи, го́ры и ка́мения стра́хом распада́хуся, и земля́ сотряса́шеся, и ад обнажа́шеся, и соомрача́шеся свет во дни, зря Тебе́ Иису́се пригвожде́на ко Кресту́.
Поми́луй мя, Бо́же, поми́луй мя.
Досто́йных покая́ния плодо́в не истяжи́ от мене́, и́бо кре́пость моя́ во мне оскуде́, се́рдце мне да́руй при́сно сокруше́нное, нищету́ же духо́вную, да сия́ Тебе́ принесу́, я́ко прия́тную же́ртву, еди́не Спа́се.
Поми́луй мя, Бо́же, поми́луй мя.
Судие́ мой, и ве́дче мой, хотя́й па́ки приити́ со а́нгелы, суди́ти ми́ру всему́, ми́лостивным Твои́м о́ком тогда́ ви́дев мя, пощади́ и уще́дри мя Иису́се, па́че вся́каго естества́ челове́ча согреши́вша.
Преподо́бная ма́ти Мари́е, моли́ Бо́га о нас.
Удиви́ла еси́ всех стра́нным житие́м твои́м, а́нгелов чи́ны, и челове́ков собо́ры, невеще́ственно пожи́вши, и естество́ преше́дши: и́мже, я́ко невеще́ственныма нога́ма вше́дши Мари́е, Иорда́н прешла́ еси́.
Преподо́бная ма́ти Мари́е, моли́ Бо́га о нас.
Уми́лостиви Созда́теля о хва́лящих тя, преподо́бная ма́ти, изба́витися озлобле́ний и скорбе́й о́крест напа́дающих: да изба́вившеся от напа́стей, возвели́чим непреста́нно просла́вльшаго тя Го́спода.
Преподо́бне о́тче Андре́е, моли́ Бо́га о нас.
Андре́е честны́й, и о́тче треблаже́ннейший, па́стырю Кри́тский, не преста́й моля́ся о воспева́ющих тя, да изба́вимся вси гне́ва и ско́рби, и тле́ния, и прегреше́ний безме́рных, чту́щии твою́ па́мять ве́рно.
Сла́ва Отцу́ и Сы́ну и Свято́му Ду́ху.
Троичен: Тро́ице Единосу́щная, Еди́нице Триипоста́сная, Тя воспева́ем, Отца́ сла́вяще, Сы́на велича́юще и Ду́ху покланя́ющеся, Еди́ному Естеству́ вои́стинну Бо́гу, Жи́зни же и Живу́щему Ца́рству безконе́чному.
И ны́не и при́сно и во ве́ки веко́в. Ами́нь.
Богородичен: Град Твой сохраня́й Богороди́тельнице Пречи́стая: в Тебе́ бо сей ве́рно ца́рствуяй, в Тебе́ и утвержда́ется: и Тобо́ю побежда́яй, побежда́ет вся́кое искуше́ние, и пленя́ет ра́тники, и прохо́дит послуша́ние.
Таже оба лика поют ирмос: Безсе́меннаго зача́тия рождество́ несказа́нное, Ма́тере безму́жныя нетле́нен плод, Бо́жие бо рожде́ние обновля́ет естества́; те́мже Тя вси ро́ди, я́ко Богоневе́стную Ма́терь, правосла́вно велича́ем.