Кондак 1
Возбрáнный Чудотвóрче и изря́дный уго́дниче Христо́в, ми́ру всему́ источáяй многоцéнное ми́лости ми́ро, и неисчерпáемое чудéс мóре, восхваля́ю тя любóвию, святи́телю Никóлае: ты же я́ко имéяй дерзновéние ко Гóсподу, от вся́ких мя бед свободи́, да зову́ ти: Рáдуйся, Никóлае, вели́кий Чудотвóрче.
Икос 1
Ангела óбразом, земнáго су́ща естествóм, яви́ тебé всея́ твáри Создáтель; благоплóдную бо добрóту души́ твоея́ прови́дев, преблáженне Никóлае, научи́ всех вопи́ти тебé си́це: Рáдуйся, от утрóбы мáтерния очи́щенныи́; рáдуйся, дáже до концá освящéнный. Рáдуйся, рождéнием свои́м роди́телей удиви́вый; рáдуйся, си́лу душéвную áбие по рождествé яви́вый. Рáдуйся, сáде земли́ обетовáния; рáдуйся, цвéте Божéственнаго саждéния. Рáдуйся, лозó добродéтельная виногрáда Христóва; рáдуйся, дрéво чудотóчное рая́ Иису́сова. Рáдуйся, кри́не рáйскаго прозябéния; рáдуйся, ми́ро Христóва благоухáния. Рáдуйся, я́ко тобóю отгóнится рыдáние; рáдуйся, я́ко тобóю принóсится рáдование. Рáдуйся, Никóлае, вели́кий Чудотвóрче.
Кондак 2
Ви́дяще твои́х мир излия́ние, Богому́дре, просвещáемся душáми и телесы́, ди́внаго тя миротóчца живонóсна, Никóлае, разумéюще: чудесы́ бо я́ко водáми, благодáтию Бóжиею изливáющимися, напая́еши вéрно вопию́щих к Бóгу: Аллилу́иа.
Икос 2
Рáзум неуразумéнный вразумля́я о Святéй Трóице, был еси́ в Никéи со святы́ми отцы́ побóрник исповéдания правослáвныя вéры: рáвна бо Отцу́ Сы́на исповéдал еси́, соприсносу́щна и сопрестóльна, Ариа же безу́мнаго обличи́л еси́. Сегó рáди вéрнии научи́шася воспевáти тебé: Рáдуйся, вели́кий благочéстия стóлпе; рáдуйся, вéрных прибéжища грáде. Рáдуйся, твéрдое Правослáвия укреплéние; рáдуйся, честнóе Пресвяты́я Трóицы носи́ло и похвалéние. Рáдуйся, Отцу́ равночéстна Сы́на проповéдавыи́; рáдуйся, Ариа возбеси́вшагося от Собóра святы́х отгнáвый. Рáдуйся, óтче, отцéв слáвная красотó; рáдуйся, всех богому́дрых прему́драя добрóто. Рáдуйся, óгненная словесá испущáяй; рáдуйся, дóбре стáдо своé наставля́яй. Рáдуйся, я́ко тобóю вéра утверждáется; рáдуйся, я́ко тобóю éресь низлагáется. Рáдуйся, Никóлае, вели́кий Чудотвóрче.
Кондак 3
Си́лою, дáнною ти свы́ше, слезу́ вся́ку отъя́л еси́ от лицá лю́те стрáждущих, богонóсе óтче Никóлае: áлчущим бо яви́лся еси́ корми́тель, в пучи́не морстéй су́щим изря́дный прави́тель, неду́гующим исцелéние, и всем всяк помóщник показáлся еси́, вопию́щим Бóгу: Аллилу́иа.
Икос 3
Имéяше вои́стинну, óтче Никóлае, с небесé песнь тебé воспевáема бы́ти, а не от земли́: кáко бо кто от человéк возмо́жет твоея́ святы́ни вели́чия проповéдати; но мы, любóвию твоéю побеждáеми, вопиéм ти си́це: Рáдуйся, óбразе áгнцев и пáстырей; рáдуйся, святóе очисти́лище нрáвов. Рáдуйся, добродéтелей вели́ких вмести́лище; рáдуйся, святы́ни чи́стое и честнóе жили́ще. Рáдуйся, свети́льниче всесвéтлый и вселюби́мыи́; рáдуйся, свéте златозáрный и непорóчный. Рáдуйся, достóйный Ангелов собесéдниче; рáдуйся, дóбрый человéков настáвниче. Рáдуйся, прáвило вéры благочести́выя; рáдуйся, óбразе крóтости духóвныя. Рáдуйся, я́ко тобóю от страстéй телéсных избавля́емся; рáдуйся, я́ко тобóю слáдостей духóвных исполня́емся. Рáдуйся, Никóлае, вели́кий Чудотвóрче.
Кондак 4
Бу́ря недоумéния смущáет ми ум, кáко достóйно есть пéти чудесá твоя́, блажéнне Никóлае; никтóже бо мóжет я́ исчести́, áще бы и мнóги язы́ки имéл, и глагóлати восхотéл; но мы ди́вно Бóгу в тебé прославля́ющемуся дерзáем воспевáти: Аллилу́иа.
Икос 4
Слы́шаша, богому́дре Никóлае, бли́жнии и дáльнии вели́чие чудéс твои́х, я́ко по возду́ху лéгкими благодáтными крилáми навы́кл еси́ су́щих в бедáх предваря́ти, скóро от тех избавля́я всех, вопию́щих к тебé таковáя: Рáдуйся, избавлéние от печáли; рáдуйся, подая́ние благодáти. Рáдуйся, нечáемых зол прогони́телю; рáдуйся, желáемых благи́х насади́телю. Рáдуйся, скóрый утéшителю в бедé су́щих; рáдуйся, стрáшный наказáтелю оби́дящих. Рáдуйся, чудéс пучи́но Бóгом излия́нная; рáдуйся, закóна Христóва скрижáли Бóгом пи́санныя. Рáдуйся, крéпкое пáдающих возведéние; рáдуйся, прáво стоя́щих утверждéние. Рáдуйся, я́ко тобóю вся́кая лесть обнажáется; рáдуйся, я́ко тобóю вся́кая и́стина сбывáется. Рáдуйся, Никóлае, вели́кий Чудотвóрче.
Кондак 5
Боготéчная звездá яви́лся еси́, наставля́я по мóрю плáвающих лю́те, и́мже смерть предстоя́ше вскóре иногдá, áще не бы́ ты предстáл еси́ призывáющим тя в пóмощь, Чудотвóрче святы́й Никóлае; ужé бо несты́дно бесóм летáющим, и погрузи́ти корабли́ хотя́щим запрети́в, отгнáл еси́ их, вéрныя же научи́л еси́ спасáющему тобóю Бóгу взывáти: Аллилу́иа.
Икос 5
Ви́деша отрокови́цы, на брак сквéрный нищеты́ рáди угото́ванныя, вели́кое твоé к ни́щим милосéрдие, преблажéнне óтче Никóлае, егдá стáрцу роди́телю их нóщию узельцы́ три злáта тая́ся пóдал еси́, самагó со дщерьми́ избавля́я от падéния грехóвнаго. Тогó рáди слы́шиши от всех си́це: Рáдуйся, ми́лости превели́кия сокрóвище; рáдуйся, промышлéния о лю́дех прия́телище. Рáдуйся, пи́ще и отрáдо к тебé прибегáющих; рáдуйся, хлéбе неснедáемый áлчущих. Рáдуйся, богáтство бéдне живу́щим на земли́ Бóгом дáнное; рáдуйся, воздви́жение скóрое у́богих. Рáдуйся, бы́строе ни́щих услы́шание; рáдуйся, скорбя́щих прия́тное попечéние. Рáдуйся, триéх дев непорóчный невести́телю; рáдуйся, чистоты́ усéрдный храни́телю. Рáдуйся, ненадéжных надéяние; рáдуйся, всегó ми́ра наслаждéние. Рáдуйся, Никóлае, вели́кий Чудотвóрче.
Кондак 6
Проповéдует мир весь тебé, преблажéнне Никóлае, скóраго в бедáх засту́пника: я́ко мно́гажды во еди́ном чáсе, по земли́ путешéствующим и по мóрю плáвающим, предваря́я, посóбствуеши, ку́пно всех от злых сохраня́я, вопию́щих к Бóгу: Аллилу́иа.
Икос 6
Возсия́л еси́ свет живóтный, избавлéние нося́ воевóдам, непрáведную смерть прия́ти иму́щим, тебé, дóбрый пáстырю Никóлае, призывáющим, егдá вскóре я́влься во сне царéви, устраши́л еси́ егó, сих же невреждéнных отпусти́ти повелéл еси́. Сегó рáди с ни́ми ку́пно и мы благодáрственно вопиéм ти: Рáдуйся, усéрдно призывáющим тя помогáяй; рáдуйся, от непрáведнаго убиéния избавля́яй. Рáдуйся, от лéстныя сохраня́яй клеветы́; рáдуйся, непрáведныя разрушáяй совéты. Рáдуйся, растерзáяй лжу я́ко паучи́ну; рáдуйся, возношáяй слáвно и́стину. Рáдуйся, непови́нных от уз разрешéние; рáдуйся, и мертвецéв оживлéние. Рáдуйся, прояви́телю прáвды; рáдуйся, помрачи́телю непрáвды. Рáдуйся, я́ко тобóю непови́ннии избáвлени от мечá; рáдуйся, я́ко тобóю наслади́шася свéта. Рáдуйся, Никóлае, вели́кий Чудотвóрче.
Кондак 7
Хотя́ богоху́льное ерети́ческое отгнáти злосмрáдие, ми́ро вои́стинну благовóнное, тáинственное яви́лся еси́, Никóлае: лю́ди мирéйския упáсл еси́, и весь мир свои́м благодáтным ми́ром испóлнил еси́. И от нас у́бо богомéрзкое грехóвное злосмрáдие отжени́, да благоприя́тно Бóгу вопиéм: Аллилу́иа.
Икос 7
Нóваго тя Нóя, настáвника ковчéга спаси́тельнаго разумéем, о́тче святы́й Никóлае, бу́рю всех лю́тых разгоня́ющаго направлéнием свои́м, тишину́ же божéственную принося́щаго вопию́щим таковáя: Рáдуйся, обуревáемых ти́хое пристáнище; рáдуйся, утопáющих извéстное храни́лище. Рáдуйся, плáвающих посредé пучи́н дóбрый кóрмчий; рáдуйся, треволнéния морскáя уставля́ющий. Рáдуйся, превождéние су́щих в ви́хрех; рáдуйся, согрéяние су́щих во мрáзех. Рáдуйся, сия́ние, ско́рбный мрак разгоня́ющее; рáдуйся, свети́ло, вся концы́ земли́ просвещáющее. Рáдуйся, от бéздны грехóвныя человéки избавля́яй; рáдуйся, в бéздну áдскую сатану́ ввергáяй. Рáдуйся, я́ко тобóю дерзновéнно бéздну милосéрдия Бóжия призывáем; рáдуйся, я́ко тобóю от потóпа гнéва избáвльшеся, мир с Бóгом обретáем. Рáдуйся, Никóлае, вели́кий Чудотвóрче.
Кондак 8
Стрáнное чу́до явля́ется притекáющим к тебé, блажéнне Никóлае, свящéнная твоя́ цéрковь: в ней бо и мáлое молéние принося́ще, вéлиих неду́гов приéмлем исцелéние, áще тóкмо по Бóзе уповáние на тя возлóжим, вéрно вопию́ще: Аллилу́иа.
Икос 8
Весь еси́ всем вои́стинну помóщник, богонóсе Никóлае, и собрáл еси́ вку́пе вся прибегáющия к тебé, я́ко свободи́тель, питáтель и врач скóрый всем земны́м, на похвалу́ всех подвизáя, вопи́ти к тебé си́це: Рáдуйся, вся́ких исцелéний истóчниче; рáдуйся, лю́те стрáждущим помóщниче. Рáдуйся, зарé, сияю́щая в нощи́ грехóвной блуждáющим; рáдуйся, росó неботóчная в знои́ трудóв су́щим. Рáдуйся, подавáяй трéбующим благостроéние; рáдуйся, уготовля́яй прося́щим изоби́лие. Рáдуйся, мнóгажды прошéние предваря́яй; рáдуйся, стáрым седи́нам си́лу обновля́яй. Рáдуйся, мнóгих заблуждéний от пути́ и́стиннаго обличи́телю; рáдуйся, тáин Бóжиих вéрный служи́телю. Рáдуйся, я́ко тобóю зáвисть попирáем; рáдуйся, я́ко тобóю благонрáвное житиé исправля́ем. Рáдуйся, Никóлае, вели́кий Чудотвóрче.
Кондак 9
Вся́кия утоли́ болéзни, вели́кий наш засту́пниче Никóлае: растворя́я благодáтная врачевáния, услаждáющая ду́ши нáша, сердцá же веселя́щая всех усéрдно к пóмощи твоéй притекáющих, Бóгу же вопию́щих: Аллилу́иа.
Икос 9
Вети́я суему́дренныя нечести́вых ви́дим тобóю посрамлéнныя, богому́дре óтче Никóлае: Ариа бо ху́льника, разделя́юща Божествó, и Савéллиа, смешáюща Святу́ю Трóицу, препрéл, нас же во правослáвии укрепи́л еси́. Сегó рáди вопиéм ти си́це: Рáдуйся, щи́те, защищáяй благочéстие; рáдуйся, мечу́, посецáяй злочéстие. Рáдуйся, учи́телю Божéственных велéний; рáдуйся, губи́телю богопроти́вных учéний. Рáдуйся, лéствице, Бóгом утверждéнная, éюже восхóдим к небеси́; рáдуйся, покрóве, Бóгом здáнный, и́мже покрывáются мнóзи. Рáдуйся, нему́дрых умудри́вый твои́ми словесы́; рáдуйся, лени́вых подви́гнувый твои́ми нрáвы. Рáдуйся, свéтлосте зáповедей Бóжиих неугаси́мая; рáдуйся, лучé оправдáний Госпóдних пресвéтлая. Рáдуйся, я́ко учéнием твои́м сокрушáются ерети́ческия главы́; рáдуйся, я́ко тобóю вéрнии сподобля́ются слáвы. Рáдуйся, Никóлае, вели́кий Чудотвóрче.
Кондак 10
Спасти́ хотя́ ду́шу, плоть твою́ ду́хови покори́л еси́ вои́стинну, óтче наш Никóлае: молчáньми бо прéжде и борéньми с пóмыслы, дея́нию богомы́слие приложи́л еси́, богомы́слием же рáзум совершéн стяжáл еси́, и́мже дерзновéнно с Бóгом и Ангелы бесéдовал еси́, всегдá вопию́щи: Аллилу́иа.
Икос 10
Стенá еси́ похваля́ющим, преблажéнне, чудесá твоя́, и всем к заступлéнию твоему́ прибегáющим; тéмже и нас, в добродéтели убóгих, от нищеты́, напáсти, неду́гов и нужд разли́чных свобождáй, вопию́щих ти с любóвию таковáя: Рáдуйся, от убóжества вéчнаго изымáяй; рáдуйся, богáтство нетлéнное подавáяй. Рáдуйся, брáшно неги́блющее áлчущим прáвды; рáдуйся, питиé неисчерпáемое жáждущим жи́зни. Рáдуйся, от мятéжа и брáни соблюдáяй; рáдуйся, от уз и пленéния свобождáяй. Рáдуйся, преслáвный в бедáх засту́пниче; рáдуйся, превели́кий в напáстех защи́тниче. Рáдуйся, мнóгих от поги́бели исхи́тивыи́; рáдуйся, безчи́сленных невреждéнно сохрани́вый. Рáдуйся, я́ко тобóю лю́тыя смéрти грéшнии избегáют; рáдуйся, я́ко тобóю жизнь вéчную кáющиися получáют. Рáдуйся, Никóлае, вели́кий Чудотвóрче.
Кондак 11
Пéние Пресвятéй Трóице пáче ины́х принéсл еси́, преблажéнне Никóлае, умóм, слóвом и дéлом: мнóгим бо испытáнием правовéрная повелéния уясни́л еси́, вéрою, надéждою и любóвию наставля́я нас в Трóице Еди́ному Бóгу воспевáти: Аллилу́иа.
Икос 11
Светозáрную лучу́ во мрáце жития́ су́щим неугаси́мую, ви́дим тя, Бо́гом избрáнне о́тче Нико́лае: с невещéственными бо áнгельскими свéты бесéдуеши о несоздáнном Трóическом Свéте, вéрных же ду́ши просвещáеши, вопию́щих ти таковáя: Рáдуйся, озарéние Трисóлнечнаго свéта; рáдуйся, денни́це незаходи́маго Сóлнца. Рáдуйся, свещé, Божéственным плáменем возжжéнная; рáдуйся, я́ко угаси́л еси́ бесóвский плáмень нечéстия. Рáдуйся, свéтлое правовéрия проповéдание; рáдуйся, доброзрáчное свéта Евáнгельскаго сия́ние. Рáдуйся, мóлние, éреси пожигáющая; рáдуйся, грóме, устрашáющий соблазня́ющия. Рáдуйся, и́стиннаго научи́телю рáзума; рáдуйся, тáинственнаго изъяви́телю ума. Рáдуйся, я́ко тобóю попрáся поклонéние твáри; рáдуйся, я́ко тобóю научи́хомся покланя́тися Творцу́ в Трóице. Рáдуйся, Никóлае, вели́кий Чудотвóрче.
Кондак 12
Благодáть дáнную ти от Бóга свéдущии, рáдующеся твою́ пáмять прáзднуем по дóлгу, преслáвный о́тче Нико́лае, и к чу́дному заступлéнию твоему́ вседу́шно притекáем; преслáвных же твои́х дея́ний, я́ко пескá морскáго и мнóжества звéзднаго исчести́ не могу́ще, недоумéнием объя́ти бы́вше, вопиéм к Бóгу: Аллилу́иа.
Икос 12
Пою́ще твоя́ чудесá, восхваля́ем тя, всехвáльне Никóлае: в тебé бо Бог в Трóице прославля́емый ди́вно прослáвися. Но áще и попремнóгу состáвленныя от души́ псалмы́ и пéсни принóсим ти, Чудотвóрче святы́й, ничто́же твори́м рáвно даровáнию чудéс твои́х, и́мже удивля́ющеся, вопиéм к тебé таковáя: Рáдуйся, Царя́ цáрствующих и Гóспода госпóдствующих служи́телю; рáдуйся, служи́телей Егó небéсных сожи́телю. Рáдуйся, лю́дем вéрным поможéние; рáдуйся, рóда христиáнскаго возвышéние. Рáдуйся, побéды тезоимени́тый; рáдуйся, венценóсче нарочи́тый. Рáдуйся, всех добродéтелей зерцáло. Рáдуйся, всех притекáющих к тебé крéпкое забрáло. Рáдуйся, по Бóзе и Богоро́дице, все нáше уповáние; рáдуйся, телéс нáших здрáвие и душ спасéние. Рáдуйся, я́ко тобóю от вéчныя смéрти свобождáемся; рáдуйся, я́ко тобóю безконéчныя жи́зни сподобля́емся. Рáдуйся, Никóлае, вели́кий Чудотвóрче.
Кондак 13
О, пресвяты́й и пречу́дный óтче Никóлае, утешéние всех скорбя́щих, ны́нешнее нáше приими́ приношéние, и от геéнны избáвитися нам Гóспода умоли́, богоприя́тным твои́м ходáтайством, да с тобóю воспевáем: Аллилу́иа.
Этот кондак читается трижды, затем 1-й икос: Ангела óбразом... и 1-й кондак: Возбрáнный Чудотвóрче...
Икос 1
Ангела óбразом, земнáго су́ща естествóм, яви́ тебé всея́ твáри Создáтель; благоплóдную бо добрóту души́ твоея́ прови́дев, преблáженне Никóлае, научи́ всех вопи́ти тебé си́це: Рáдуйся, от утрóбы мáтерния очи́щенныи́; рáдуйся, дáже до концá освящéнный. Рáдуйся, рождéнием свои́м роди́телей удиви́вый; рáдуйся, си́лу душéвную áбие по рождествé яви́вый. Рáдуйся, сáде земли́ обетовáния; рáдуйся, цвéте Божéственнаго саждéния. Рáдуйся, лозó добродéтельная виногрáда Христóва; рáдуйся, дрéво чудотóчное рая́ Иису́сова. Рáдуйся, кри́не рáйскаго прозябéния; рáдуйся, ми́ро Христóва благоухáния. Рáдуйся, я́ко тобóю отгóнится рыдáние; рáдуйся, я́ко тобóю принóсится рáдование. Рáдуйся, Никóлае, вели́кий Чудотвóрче.
Кондак 1
Возбрáнный Чудотвóрче и изря́дный уго́дниче Христо́в, ми́ру всему́ источáяй многоцéнное ми́лости ми́ро, и неисчерпáемое чудéс мóре, восхваля́ю тя любóвию, святи́телю Никóлае: ты же я́ко имéяй дерзновéние ко Гóсподу, от вся́ких мя бед свободи́, да зову́ ти: Рáдуйся, Никóлае, вели́кий Чудотвóрче.
Молитва
О, всесвяты́й Никóлае, угóдниче преизря́дный Госпóдень, тéплый наш засту́пниче, и вездé в скóрбех скóрый помóщниче! Помози́ мне грéшному и уны́лому в настоя́щем сем житии́, умоли́ Гóспода Бóга дарова́ти ми оставлéние всех мои́х грехóв, ели́ко согреши́х от ю́ности моея́, во всем житии́ моéм, дéлом, слóвом, помышлéнием и всéми мои́ми чу́вствы; и во исхóде души́ моея́ помози́ ми окая́нному, умоли́ Гóспода Бóга, всея́ твáри Содéтеля, избáвити мя возду́шных мытáрств и вéчнаго мучéния: да всегдá прославля́ю Отцá и Сы́на и Святáго Ду́ха, и твоé ми́лостивное предстáтельство, ны́не и при́сно и во вéки векóв. Ами́нь.