Иерей: Благословéн Бог наш, всегда, ныне и присно и во веки веков.
Чтец: Аминь[1]. Слава Тебе, Боже наш, слава Тебе.
Царю́ Небесный, Утéшителю, Ду́ше истины, Иже везде сый и вся исполня́яй, Сокрóвище благи́х и жи́зни Подáтелю, прииди́ и всели́ся в ны, и очисти ны от вся́кия сквéрны, и спаси, Блáже, ду́ши наша[2].
Святы́й Бóже, Святы́й Крéпкий, Святы́й Безсмéртный, поми́луй нас. (Трижды)
Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.
Пресвятáя Трóице, поми́луй нас; Гóсподи, очи́сти грехи́ нáша; Влады́ко, прости́ беззакóния нáша; Святы́й, посети́ и исцели́ нéмощи нáша, и́мене Твоегó рáди.
Гóсподи, поми́луй. (Трижды)
Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.
Отче наш, Иже еси́ на небесéх! Да святи́тся и́мя Твоé, да прии́дет Цáрствие Твоé, да бу́дет вóля Твоя́, я́ко на небеси́ и на земли́. Хлеб наш насу́щный даждь нам днесь; и остáви нам дóлги нáша, я́коже и мы оставля́ем должникóм нáшим; и не введи́ нас во искушéние, но избáви нас от лукáваго.
Иерей: Яко Твоé есть Цáрство, и си́ла, и слáва, Отцá, и Сы́на, и Святáго Духа, ны́не и при́сно, и во вéки векóв.
Чтец: Аминь.
Господи, помилуй. (12 раз)
Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.
Прииди́те, поклони́мся Цареви нашему Богу.
Прииди́те, поклони́мся и припадем Христу, Цареви нашему Богу.
Прииди́те, поклони́мся и припадем Самому Христу, Цареви и Богу нашему.
Псалом 83
Коль возлю́бленна селéния Твоя, Господи сил! Желáет и скончавáется душá моя во дворы́ Господни, сéрдце мое и плоть моя возрáдовастася о Бозе жи́ве. Ибо пти́ца обрéте себе хрáмину, и гóрлица гнездó себе, идéже положи́т птенцы́ своя, олтари́ Твоя, Господи сил, Царю́ мой и Боже мой. Блажéни живу́щии в дому́ Твоем, в веки веков восхвáлят Тя. Блажéн муж, ему́же есть заступлéние его у Тебе; восхождéния в сéрдце своем положи́, во юдóль плачéвную, в мéсто еже положи́, ибо благословéние даст законополагáяй. Пóйдут от си́лы в си́лу: яви́тся Бог богов в Сиóне. Господи Боже сил, услы́ши моли́тву мою, внуши́, Боже Иáковль. Защи́тниче наш, виждь, Боже, и при́зри на лицé христа Твоего. Яко лу́чше день един во двóрех Твоих пáче ты́сящ: извóлих приметáтися в дому́ Бога моего пáче, нéже жи́ти ми в селéниих грéшничих. Яко ми́лость и и́стину лю́бит Господь, Бог благодáть и слáву даст, Господь не лиши́т благи́х ходя́щих незлóбием. Господи Боже сил, блажéн человéк уповáяй на Тя.
Псалом 84
Благоволи́л еси́, Господи, зéмлю Твою, возврати́л еси́ плен Иáковль: остáвил еси́ беззакóния людéй Твоих, покры́л еси́ вся грехи́ их. Укроти́л еси́ весь гнев Твой, возврати́лся еси́ от гнéва я́рости Твоéя. Возврати́ нас, Боже спасéний наших, и отврати́ я́рость Твою от нас. Едá во веки прогнéваешися на ны? Или́ прострéши гнев Твой от рода в род? Боже, Ты обрáщься оживи́ши ны, и лю́дие Твои возвеселя́тся о Тебе. Яви́ нам, Господи, ми́лость Твою, и спасéние Твое даждь нам. Услы́шу, что речéт о мне Господь Бог: яко речéт мир на лю́ди Своя, и на преподóбныя Своя, и на обращáющыя сердцá к Нему́. Обáче близ боя́щихся Его спасéние Его, всели́ти слáву в зéмлю нáшу. Ми́лость и и́стина сретóстеся, прáвда и мир облобызастася. Истина от земли возсия́, и прáвда с Небесé прини́че, ибо Господь даст блáгость, и земля́ нáша даст плод свой. Прáвда пред Ним предъи́дет, и положи́т в путь стопы́ своя́.
Псалом 85
Приклони́, Господи, ухо Твое, и услы́ши мя, яко нищ и убóг есмь аз. Сохрани́ ду́шу мою, яко преподóбен есмь: спаси́ рабá Твоегó, Боже мой, уповáющаго на Тя. Поми́луй мя, Господи, яко к Тебе воззову́ весь день. Возвесели́ ду́шу рабá Твоегó, яко к Тебе взях ду́шу мою. Яко Ты, Господи, Благ и Крóток, и Многоми́лостив всем призывáющым Тя. Внуши́, Господи, моли́тву мою, и вонми́ глáсу молéния моегó. В день скóрби моéя воззвáх к Тебé, яко услы́шал мя еси́. Несть подóбен Тебé в бозéх, Господи, и несть по делóм Твои́м. Вси язы́цы, ели́ки сотвори́л еси́, прии́дут, и поклóнятся пред Тобою, Господи, и прослáвят имя Твоé, яко Вéлий еси́ Ты, и творя́й чудесá, Ты еси́ Бог Един. Настáви мя, Господи, на путь Твой, и пойду́ во и́стине Твоей; да возвесели́тся сéрдце мое боя́тися и́мене Твоего. Исповéмся Тебé, Господи Боже мой, всем сéрдцем моим, и прослáвлю имя Твое в век: яко ми́лость Твоя вéлия на мне, и избáвил еси́ ду́шу мою от áда преиспóднейшаго. Боже, законопресту́пницы востáша на мя, и сонм держáвных взыскáша душу мою, и не предложи́ша Тебе пред собóю. И Ты, Господи Боже мой, Щéдрый и Ми́лостивый, Долготерпели́вый и Многоми́лостивый и Истинный, при́зри на мя и поми́луй мя, даждь держáву Твою óтроку Твоему́, и спаси́ сы́на рабы́ Твоéя. Сотвори́ со мною знáмение во блáго, и да ви́дят ненави́дящии мя, и постыдя́тся, яко Ты, Господи, помогл ми и утéшил мя еси́. Сотвори́ со мною знáмение во блáго, и да ви́дят ненави́дящии мя, и постыдя́тся, яко Ты, Господи, помогл ми и утéшил мя еси́.
Слава, и ныне:
Аллилуиа, аллилуиа, аллилуиа, слава Тебе, Боже. (Трижды)
Господи, помилуй. (Трижды)
(Если Великий пост, читаем кафисму, когда это положено, затем поем тропарь, гл. 8:
Иже в девятый час нас ради плотию смерть вкуси́вый, умертви́ плóти нáшея мудровáние, Христе Боже, и спаси нас.
Чтец — стих 1: Да прибли́жится молитва моя пред Тя, Господи, по словеси́ Твоему вразуми́ мя.
Хор: Иже в девятый час...
Чтец — стих 2: Да вни́дет прошение мое пред Тя, Господи, по словеси́ Твоему избави мя.
Хор: Иже в девятый час...)
Если не Великий пост:
Тропарь дня.
Слава, и ныне: Богородичен:
Иже нас ради рождéйся от Девы, и распятие претерпéв, Благи́й, испровéргий смертию смерть, и воскресение явлéй яко Бог, не прéзри, яже создáл еси́ рукою Твоею; яви́ человеколюбие Твое, Ми́лостиве, приими́ рóждшую Тя Богородицу, молящуюся за ны, и спаси́, Спáсе наш, люди отчáянныя.
Не предáждь нас до конца, и́мене Твоего ради, и не разори́ завета Твоего, и не отстáви милости Твоéя от нас, Авраáма ради возлюбленнаго от Тебе, и за Исаáка, раба Твоего, и Изрáиля святаго Твоего.
Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвятáя Трóице, поми́луй нас; Гóсподи, очи́сти грехи́ нáша; Влады́ко, прости́ беззакóния нáша; Святы́й, посети́ и исцели́ нéмощи нáша, и́мене Твоегó рáди.
Гóсподи, поми́луй. (Трижды)
Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.
Отче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Иерей: Яко Твоé есть Цáрство, и си́ла, и слáва, Отцá, и Сы́на, и Святáго Духа, ны́не и при́сно, и во вéки векóв.
Хор: Ами́нь.
Кондак праздника
(Если кондака нет, или Великий пост:
Видя разбойник Начальника жизни на кресте ви́сяща, глагóлаше: áще не бы Бог был воплóщься, Иже с нами распны́йся, не бы солнце лучи своя потаи́ло; нижé бы земля трепéщущи тряслася, но вся терпяй, помяни́ мя, Господи, во Царствии Твоем.
Слава: Посредé двою́ разбóйнику, мéрило праведное обрéтеся крест Твой: óвому у́бо низводи́му во ад тяготóю хуления, другому же легчáщуся от прегрешений, к познанию богословия. Христе Боже, слава Тебе.
И ныне: Агнца, и Пастыря, и Спаса мира, на кресте зря́щи, Рóждшая Тя глагóлаше слезя́щи: мир убо радуется, приéмля избавление, утроба же Моя горит, зря́щи Твое распятие, еже за всех терпи́ши, Сы́не и Боже мой.)
Господи, помилуй. (40 раз)
Иже на всякое время и на всякий час, на небеси́ и на земли покланя́емый и слáвимый, Христе Боже, Долготерпели́ве, Многоми́лостиве, Многоблагоутрóбне, Иже праведныя любя́й, и грешныя ми́луяй, Иже вся зовы́й ко спасению обещания ради будущих благ, Сам, Господи, приими́ и наша в час сей молитвы, и исправи живот наш к зáповедем Твоим, души наша освяти́, телеса очисти, помышления исправи, мысли очисти, и избави нас от всякия скóрби, зол и болезней, огради нас святыми Твоими Ангелы, да ополчéнием их соблюдáеми и наставля́еми, достигнем в соединение веры, и в разум непристу́пныя Твоéя славы, яко благословен еси́ во веки веков, аминь.
Господи, помилуй. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Честнéйшую Херуви́м и слáвнейшую без сравнения Серафим, без истлéния Бога Слова рóждшую, сущую Богородицу Тя величаем.
Именем Господним благослови, отче.
Иерей: Бо́же, уще́дри ны и благослови́ ны, просвети́ лице́ Твое́ на ны и поми́луй ны.
(Если Великий пост — молитва св. Ефрема Сирина:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь.)
Чтец: Аминь.
Молитва святителя Василия Великого
Владыко Господи, Иисусе Христе Боже наш, долготерпéвый о наших согрешениих, и даже до нынешняго часá приведы́й нас, вóньже на животворящем древе ви́ся, благоразумному разбойнику, иже в рай путесотвори́л еси́ вход, и смертию смерть разруши́л еси́, очисти нас, грешных и недостойных раб Твоих. Согрешихом бо и беззакóнновахом, и нéсмы достойни возвести очесá наша и воззрети на высоту небесную; занé остáвихом путь правды Твоéя, и ходи́хом в волях сердец наших. Но молим Твою безмерную благость, пощади нас, Господи, по множеству милости Твоея́, и спаси нас и́ мене Твоего ради святаго, яко исчезóша в суете дни́е наши, изми́ нас из руки́ сопротивнаго, и остави нам грехи наша, и умертви́ плотскóе наше мудровáние, да ветхаго отложивше человека, в новаго облецéмся, и Тебе поживéм, нашему Влады́це и Благодетелю, и тако Твоим послéдующе повелéнием, в вечный покой достигнем, идéже есть всех веселящихся жилище, Ты бо еси́ воистинну истинное веселие и радость любящих Тя, Христе Боже наш, и Тебе славу возсылаем, со Безначальным Твоим Отцем, и Пресвяты́м и Благи́м и Животворя́щим Твоим Духом, ныне и присно и во веки веков.
Аминь.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Господи, помилуй. (Трижды) Благослови.
(Священник произносит отпуст)
Чтец: Аминь.