Тропарь, глас 4
Небе́сных во́инств Архистрати́зи, мо́лим вас при́сно мы, недосто́йнии, да ва́шими моли́твами оградите́ нас кро́вом крил невеще́ственныя ва́шея сла́вы, сохраня́юще ны, припа́дающия приле́жно и вопию́щия: от бед изба́вите ны, я́ко чинонача́льницы Вы́шних сил.
Канон, глас 8
Песнь 1
Ирмос: Песнь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, песнь побе́дную пою́ще и вопию́ще: пои́м Тебе́, Еди́ному Влады́це.
Святи́и Арха́нгели и Ангели, моли́те Бо́га о нас.
Вси воспои́м, ве́рнии, вся направля́ющую невеще́ственныя ли́ки вы́шняго чинонача́лия, Тро́ицу Несозда́нную: свят, свят, свят еси́, вопию́ще, Бо́же Вседержи́телю.
Святи́и Арха́нгели и Ангели, моли́те Бо́га о нас.
Положи́л еси́ тва́рем нача́ток, существо́ Безпло́тное, Тво́рче Ангелов, Пречи́стый Твой Престо́л окружа́юща, зва́ти Ти́: Свят, Свят, Свят еси́, Бо́же Вседержи́телю.
Святи́и Арха́нгели и Ангели, моли́те Бо́га о нас.
Ра́дуйся, Гаврии́ле, Бо́жия воплоще́ния восвести́телю, Михаи́ле же, чино́в невеще́ственных предста́телю, непреста́нно зову́ще: свят, свят, свят еси́, Бо́же Вседержи́телю.
Пресвята́я Богоро́дице, спаси́ нас.
Богородичен: Трепе́щу та́инства, Христе́, Твоего́ схожде́ния, я́ко и́же естество́м Бог, прия́л еси́ от Де́вы роди́тися я́ко челове́к, да спасе́ши мир от рабо́ты сопроти́внаго.
Песнь 3
Ирмос: Страх Твой, Го́споди, всади́ в сердца́ раб Твои́х и бу́ди нам утвержде́ние, Тя во и́стине призыва́ющим.
Святи́и Арха́нгели и Ангели, моли́те Бо́га о нас.
Кре́постию уста́вил еси́, Безсме́ртне, си́льныя, соверша́ющия пресвято́е Твое́ хоте́ние, Тебе́ в вы́шних всегда́ предстоя́щия.
Святи́и Арха́нгели и Ангели, моли́те Бо́га о нас.
Хода́таи Твоего́ вочелове́чения и честна́го воста́ния, а́нгельския чинонача́льники, Христе́, за ны приими́ моля́щияся.
Святи́и Арха́нгели и Ангели, моли́те Бо́га о нас.
Ангелы приста́вил еси́ храни́тели челове́ком, я́ко благоутро́бен, служи́тели же показа́л еси́, Христе́, спасе́ния Твои́и уго́дником.
Пресвята́я Богоро́дице, спаси́ нас.
Богородичен: Неизрече́нно ро́ждши, Богоневе́сто, Спа́са и Го́спода, изба́ви нас от тли, Тя вои́стинну призыва́ющих.
Седален, глас 8
Небе́сных нача́льниче и первостоя́телю высокопресто́льных и стра́шных Боже́ственныя сла́вы Михаи́ле Архистрати́же, Ангелом чинонача́льниче, со все́ми безпло́тными, Ему́же служи́ши Влады́це, о всем ми́ре непреста́нно моли́ся и испроси́ оставле́ние грехов, и ми́лость, и благода́ть обрести́ в день су́дный.
Сла́ва Отцу́ и Сы́ну и свято́му Ду́ху, и ны́не и при́сно и во ве́ки веко́в. Ами́нь.
Богородичен: В пучину люте впад уныния, от множества лукавых и беззаконных ми дел, приидох в недоумение, и отчаянием ныне одержуся: Владычице Богородице, Тя мя спаси, Ты ми помози: грешных бо Ты еси очищение и чистота спасительная.
Крестобогородичен (читается в среду и пяток): От чи́стых крове́й Твои́х вопло́щшася, и па́че ума́ из тебе́ Чи́стая ро́ждшагося, на дре́ве ви́сяща посреде́ злоде́ю зря́щи, боле́зновала еси́ и ма́терски пла́чущи вопия́ла еси́: увы́ мне, Ча́до Мое́, что есть Боже́ственное и неизрече́нное смотре́ние твое́, и́мже оживотвори́л еси́ созда́ние Твое́; пою́ Твое́ милосе́рдие.
Песнь 4
Ирмос: Всел еси́ на ко́ни, апо́столы Твоя́, Го́споди, и прия́л еси́ рука́ма Твои́ма узды́ их, и спасе́ние бысть ежде́ние Твое́ ве́рно пою́щим: сла́ва си́ле Твое́й, Го́споди.
Святи́и Арха́нгели и Ангели, моли́те Бо́га о нас.
Всел еси́ на Ангелы, я́коже на ко́ни, Человеколю́бче, и прия́л еси́ руко́ю Твое́ю вожда́ их, и спасе́ние бысть ежде́ние Твое́ ве́рно Ти вопию́щим: сла́ва си́ле Твое́й, Го́споди.
Святи́и Арха́нгели и Ангели, моли́те Бо́га о нас.
Покрыва́ет Ангелы доброде́тель Твоя́, Безсме́ртне, и земны́я исполня́ет концы́ Твоего́ сла́внаго, Безнача́льне, Боже́ственнаго хвале́ния, с ни́миже Тебе́ вопие́м: сла́ва си́ле Твое́й, Го́споди.
Святи́и Арха́нгели и Ангели, моли́те Бо́га о нас.
Изше́л еси́, Ще́дре, на спасе́ние лю́дем Твои́м, Христе́, созыва́еши же дру́ги, си́лы Твоя́, и весе́лие бысть во спасе́нии Твое́м безве́щным, вопию́щим: сла́ва си́ле Твое́й, Го́споди.
Пресвята́я Богоро́дице, спаси́ нас.
Богородичен: Де́ва и Ма́ти па́че естества́ яви́лася еси́, Пречи́стая, я́ко Бо́га, Того́же и Челове́ка Христа́, родила́ еси́, от Ангел хвали́маго: люде́й Твои́х печа́ль преложи́ на ра́дость моли́твами Твои́ми.
Песнь 5
Ирмос: От но́щи неве́дения Боговедением просвети́вый концы́, просвети́ мя у́тром человеколю́бия Твоего́, Го́споди.
Святи́и Арха́нгели и Ангели, моли́те Бо́га о нас.
Невозвра́тным жела́нием всегда́ к высоте́, Христе́, носи́ми, кра́йнее всех жела́ние, а́нгельския си́лы непреста́нно сла́вят.
Святи́и Арха́нгели и Ангели, моли́те Бо́га о нас.
Ты разу́мныя по существу́, нетле́нныя благода́тию Твое́ю, Христе́, поста́вил еси́ певцы́ Твоему́ вели́чествию, Ангелы Твоя́, по о́бразу соде́лав, Непостижи́ме.
Святи́и Арха́нгели и Ангели, моли́те Бо́га о нас.
Ты непрекло́нны на го́ршая к Тебе́ приближе́нием, Христе́, сохрани́л еси́ Твоя́ слу́ги, исто́чник бо бла́гости Ты еси́, благотворя́ досто́йно Ти́ служа́щим.
Пресвята́я Богоро́дице, спаси́ нас.
Богородичен: Умерщвле́нную мою́ ду́шу страстьми́ ме́рзкими, Всенепоро́чная оживи́, животу́ Храни́теля ро́ждши, и к стезе́ ве́чней, и блаже́нному житию́ устреми́.
Песнь 6
Ирмос: Ио́ну в ки́те, Го́споди, еди́наго всели́л еси́, мене́ же, свя́заннаго мре́жами вра́жиими, я́ко от тли о́наго спаси́.
Святи́и Арха́нгели и Ангели, моли́те Бо́га о нас.
Боголе́пно от несущества́, Го́споди, сло́вом приве́л еси́ существа́ Небе́сных Безсме́ртне, во́инств, светови́дны сих соде́ловая.
Святи́и Арха́нгели и Ангели, моли́те Бо́га о нас.
Служи́телие честни́и Бо́жия хвале́ния бы́сте, безпло́тнии, гра́ждане Небе́снии, и Боже́ственная вои́стинну ски́ния, Творцу́ досто́йно служа́ще.
Пресвята́я Богоро́дице, спаси́ нас.
Богородичен: Всепе́тая, Све́та поро́ждши, всем свет даю́щаго, тму мои́х прегреше́ний, Чи́стая, отжени́ Ма́терними Твои́ми к нему́ моли́твами.
Кондак, глас 2
Архистрати́зи Бо́жии, служи́телие Боже́ственныя сла́вы, Ангелов нача́льницы и челове́ков наста́вницы, поле́зное нам проси́те и ве́лию ми́лость, я́ко Безпло́тных Архистрати́зи.
Икос
Рекл еси́, Человеколю́бче, в писа́ниих Твои́х мно́жеству ра́доватися о челове́це еди́ном ка́ющемся, Безсме́ртне: тем и мы в беззако́ниих су́ще, безгре́шне Еди́не Сердцеве́дче, Тя моли́ти всегда́ дерза́ем я́ко благоутро́бнаго, уще́дрити нас и посла́ти недосто́йным умиле́ние, Влады́ко, и пода́ти нам проще́ниегрехов: о всех бо нас мо́лятся Тебе́ я́ко безпло́тных Архистрати́зи.
Песнь 7
Ирмос: Отроцы евре́йстии в пещи́ попра́ша пла́мень дерзнове́нно и на ро́су огнь преложи́ша, вопию́ще: благослове́н еси́, Го́споди Бо́же, во ве́ки.
Святи́и Арха́нгели и Ангели, моли́те Бо́га о нас.
Све́ты яви́л еси́, Ще́дре, Ангел Твои́х невеще́ственное существо́, неизрече́ннаго све́та исполня́еми непреста́нно зову́щия: благослове́н еси́, Го́споди Бо́же во ве́ки.
Святи́и Арха́нгели и Ангели, моли́те Бо́га о нас.
Ему́же предстоя́т непреста́нно, служа́ща тьмы а́нгельския, лица́ же зре́ти не терпя́т Божества́: благослове́н еси́, зову́ща, Бо́же, во ве́ки.
Святи́и Арха́нгели и Ангели, моли́те Бо́га о нас.
Сло́вом Твои́м ипоста́сным, Го́споди, а́нгельское естество́ соде́лал еси́, освяти́в же Боже́ственным Ду́хом, Тро́ицу богосло́вити научи́л еси́, Бо́же, во ве́ки.
Пресвята́я Тро́ице, Бо́же наш, сла́ва Тебе́.
Троичен: Три у́бо, зря́ще су́щия Ипоста́си, неопи́санное сла́вим Существо́, Отца́ и Сло́ва со Ду́хом, вопию́ще: благослове́н еси́, Го́споди Бо́же оте́ц на́ших.
Песнь 8
Ирмос: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся ве́ки.
Святи́и Арха́нгели и Ангели, моли́те Бо́га о нас.
Ангельскому поревну́ем житию́ и ра́зум впери́м к высоте́, и с ни́ми невеще́ственно воспое́м Го́спода и превозно́сим во ве́ки.
Святи́и Арха́нгели и Ангели, моли́те Бо́га о нас.
Лико́вственницы ли́ка Небе́снаго, иже Престо́л обстоя́ще сла́вы, о Бо́зе всегда́ обраща́еми, Ангели пою́т и славосло́вят во вся ве́ки.
Святи́и Арха́нгели и Ангели, моли́те Бо́га о нас.
Невеще́ственна огня́ творя́щей пла́мень, на высоте́ непреста́нно служа́щих, и Ангелы ду́хи явля́ющей, Тро́ице покланя́емся и славосло́вим во вся ве́ки.
Пресвята́я Богоро́дице, спаси́ нас.
Богородичен: Иже во утро́бу все́льшася Де́вы, и от Сея́ стра́нно и вы́ше сло́ва, дре́вняго Ада́ма назда́вша, Го́спода пое́м и славосло́вим во ве́ки.
Песнь 9
Ирмос: Уста́вы прешла́ еси́ естества́, Соде́теля заче́нши и Го́спода, и дверь спасе́ния ми́рови была́ еси́. Тем Тя, Богоро́дице, непреста́нно велича́ем.
Святи́и Арха́нгели и Ангели, моли́те Бо́га о нас.
Тя, неизрече́нно совокупи́вшаго Небе́сным, Христе́, земна́я и еди́ну Це́рковь соверши́вша Ангелом и челове́ком, непреста́нно велича́ем.
Святи́и Арха́нгели и Ангели, моли́те Бо́га о нас.
Ангели же и Арха́нгели, Престо́ли, Вла́сти и Госпо́дствия, Нача́ла и Си́лы, Херуви́ми и Серафи́ми, с Богоро́дицею о ми́ре моли́теся.
Пресвята́я Тро́ице, Бо́же наш, сла́ва Тебе́.
Троичен: Тя, Тро́ице, сла́вим, от небытия́ вся сотвори́вшую, и чи́ны а́нгельския украси́вшую, и Боже́ственными заря́ми просвети́вшую концы́.
Пресвята́я Богоро́дице, спаси́ нас.
Богородичен: Ра́дуйся, свята́я Богоневе́сто, ра́дуйся, Свет ми́ру ро́ждшиая ве́рным, ра́дуйся, стено́ и покро́ве всех нас. Бо́га, я́ко благоде́теля, за ны непреста́нно моли́.